اسلام آباد(پاکستان پوائنٹ نیوز11۔ستمبر2017ء) وزیر خارجا خواجا آصف دے دورہ ایران دے حوالے نال اعلامیہ جاری کر دتا گیا اے۔ وزیر خارجا خواجا آصف نے اک دن دے دورے دوران ایرانی صدر حسن روحانی نال ملاقات کیتی۔ ملاقات دوران دوویں رہنماواں وچکار باہمی دوستانہ تے تواریخی برادرانہ تعلقات نوں ودھوتری دین بارے اتفاق کیتا گیا۔ ملاقات دوران وزیر خارجا خواجا آصف دا کہنا سی کہ پاکستان گوانڈھیاں نال چنگے تعلقات دا خاہشمند اے ۔
پاکستان ایران نال رلکے علاقائی سلامتی لئی کم کرنا چاہندا اے۔ ملاقات دوران دوویں ملکاں وچکار اعلا سطح دے رابطیاں تے تجارت سنے ہور شعبیاں وچ تعاون ودھان بارے زور دتا گیا۔ ایس موقعے تے ایرانی وزیر خارجا جواد ظریف دا کہنا سی کہ ایران پاکستان نال سارے شعبیاں وچ تعلقات نوں ودھانا چاہندا اے۔ دوویں ملکاں دے وزیراں نے مقبوضہ کشمیر وچ انسانی حقاں دیاں خلاف ورزیاں بارے تشویش دا وکھالا کردے ہوئے ایس گل اُتے اتفاق کیتا کہ افغانستان دے مسئلے دا کوئی فوجی حل نہیں اے۔ایس توں وکھ دوویں ملکاں دے وزیراں ولوں روہنگیا مسلماناں اُتے ہون والے ظلماں اُتے ہرکھ دا وکھالا کیتا گیا۔
