برما(پاکستان پوائنٹ نیوز11۔ستمبر2017ء) مشہور اینکر پرسن اقرار الحسن برما وچ موجود نیں۔ کجھ دن پہلے برما توں اقرار الحسن دی پہلی ویڈیو ساہمنے آئی جدوں اوہ روہنگیا وچ متاثرا خاندان تیکر رسائی حاصل کرن دی کوشش کر رہے سن۔ اقرار الحسن دی دوجی ویڈیو ساہمنے آؤندی ای سوشل میڈیا اُتے وائرل ہو گئی۔ اقرار الحسن نے اپنی دوجی ویڈیو وچ برما وچ موجود متاثرا خاندان دے اک بندے نال گل بات کیتی جہنے دسیا کہ اجے تیکر 600توں ودھ گھراں نوں ساڑیا گیا جہدے وچ موجود کئی مسلمان زندہ سڑ گئے۔
نوجوان دا کہنا سی کہ میرا بھرا تے بھین بنگلا دیش چلے گئے نیں پر اوتھے وی ایہو جہیاں اوکڑاں دا ساہمنا اے۔ جے بنگلا دیش دی تھاں پاکستان ہوندا تے ساڈا ایہ حال کدی نہ ہوندا۔ متاثرا نوجوان نے آکھیا کہ پاکستان تے ترکی ساڈی مدد کر رہے نیں۔ مقامی نوجوان اپنیاں دو لاپتہ بھیناں نوں لبھ رہیا اے۔ اقرار الحسن نے رخائن دے اک مقبول خاندان دی سوانی نال وی گل بات کیتی۔
سوانی دا کہنا سی کہ اسیں اپنا گھر بار‘ کاروبار تے جائیداد سبھ کجھ چھڈ کے نس آئے آں۔سوانی دا کہنا سی کہ مسلمان ملکاں نے ساڈی کُجھ مدد کیتی اے۔ ساڈے کُجھ رشتے دار ایتھوں چلے گئے نیں‘ ساڈا اوہناں نال رابطہ اے تے اوہ وی چنگے حال وچ نہیں نیں۔ سوانی نے دسیا کہ رخائن وچ میرے والد تے بھرا دا کاروبار سی ساڈی جائیداد سی۔جو مقامی برمی بندیاں نے لُٹ پُٹ لیا اے۔
