امام جامع مسجد دہلی ولوں نواز شریف نوں لکھے گئے خط اُتے بی جے پی ناراض

نویں دِلی(پاکستان پوائنٹ نیوز17۔جولائی2017ء) بھارتی دارالحکومت دِلی دی جامع مسجد دے امام ولوں مسئلا کشمیر اُتے وزیر اعظم نواز شریف نوں گھلیا گیا خط بھارتی قوم پرستاں نوں ہضم نہ ہویا۔ میڈیا رپورٹس مطابق بی جے پی نے آکھیا کہ شاہی امام نوں ایس معاملے تے بولن دا کوئی اختیار نہیں۔ بی جے پی نے اپنے بیان وچ شاہی امام سید احمد بخاری دے ایس اقدام دی مذمت کردے ہوئے آکھیا کہ مسئلا کشمیر دو ملکاں دا معاملا اے۔ بی جے پی نے ہور آکھیا کہ کسے مخصوص کمیونٹی دے بندے نوں اجیہا کوئی اختیار نہیں کہ اوہ اپنے ملک دی حکومت نوں نظر انداز کرکے دوجے ملک دی حکومت نوں خط لکھے۔چیتے رہوے کہ شاہی امام نے مسئلا کشمیر نوں گل بات راہیں حل کرن لئی وزیر اعظم نواز شریف نوں خط لکھیا سی۔