تل ابیب(پاکستان پوائنٹ نیوز15۔جولائی2017ء) اسرائیل سعودی عرب توں ڈائریکٹ حج اُڈاناں دی اجازت دا خاہشمند اے۔ غیر ملکی خبر رساں ادارے مطابق ایس گل دا انکشاف اسرائیل دے وزیر مواصلات ایوب کارا نے اپنے اک انٹرویو دوران کیتا۔اسرائیلی وزیر مواصلات مطابق اوہناں حج اُڈاناں دے سلسلے وچ سعودی عرب، اردن تے ہور ملکاں نال گل بات کیتی اے تے اوہ لوک ایہدے لئی تیار نیں پر ایہ بہت حساس معاملا اے تے ایہدے اُتے ہور مذاکرات ہونے نیں۔
اسرائیلی وزیر مواصلات ایوب کارا نے آکھیا کہ ہن حقیقت بدل گئی اے تے امید کیتی جا رہی اے کہ اسرائیلی مسلمان تل ابیب دے بن گوریان ائر پورٹ توں ڈائریکٹ سعودی عرب لئی اُڈان بھر سکن گے۔ چیتے رہوے کہ حج لئی مسلمان ایتھوں بساں راہیں جاندے نیں۔ دریائے اردن تے سعودی صحرا پار کردے ہوئے اک ہزار میل دا پینڈا طے کر کے اوہ مکہ پہنچدے نیں۔ اک اندازے مطابق چھ ہزار مسلمان اسرائیل توں حج لئی جاندے نیں۔
