واشنگٹن (پاکستان پوائنٹ نیوز15۔اگست 2016ء) اک امریکی رسالے نے دعوی کیتا اے کہ افغانستان وچ بھارت تے پاکستان وچکار، پراکسی وار جاری اے۔ بھارت دے قومی سلامتی دے مثیر اجیت دول، سیکرٹری خارجا ایس جے شنکر تے سیکرٹری دفاع جی موہن کمار اُتے مشتمل ٹیم جو پراکسی وار وچ بھارت ولوں فیصلا کردی اے۔ بھارت دے اعلا دفاعی حکام افغانستان وچ امریکی جنرل نال رلکے حقانی نیٹ ورک، لشکر طیبہ تے جیش محمود خلاف کارروائی چاہندے نیں۔
امریکی رسالے فوربز دی رپورٹ دے مطابق افغان جنگ وچ سامان دی سپلائی دا طریقہ بدل دِتا گیا اے۔ امریکا دا افغان فورسز دی ٹریننگ لئی بھارت ول جھکاؤ اے۔ رسالے دا کہنا اے کہ امریکا ولوں تِن سو ملین ڈالر دی روکی گئی امداد پاک فوج لئی بہت ضروری سی۔ امریکی رسالے فوربز نے آکھیا اے کہ افغانستان وچ امریکی کمانڈر نے بھارت توں افغان فورسز دی فوجی امداد وچ وادھا کرن دا مطالبہ کیتا اے۔
جدکہ بھارت نے دسمبر وچ افغان فوج نوں چار جنگی ہیلی کاپٹر دِتے سن جہناں دا مقصد حقانی نیٹ ورک خلاف کارروائی اے۔ رسالے دے مطابق ایس گل دا صرف اک ای مقصد اے صرف پراکسی وار۔ امریکی فور سٹار جنرل جان نکلسن دے پیشرو کول وی وڈی پدھر اُتے فوجی تے سفارتی ذمے واریاں سن جدکہ جہڑے لوکاں نے امریکی جنرل نکلسن نال ملاقات کیتی اوہناں وچ بھارت دے قومی سلامتی دے مثیر اجیت دول، سیکرٹری خارجا ایس جے شنکر تے سیکرٹری دفاع جی موہن کمار شامل نیں۔
دوجے پاسے رسالے نے لکھیا اے کہ امریکی دفاع دے وزیر ولوں پاکستان دی تِن سو ملین ڈالر دی امداد روک دِتی گئی، ایہ امداد پاک فوج لئی بہت ضروری سی۔ 2002 توں ہُن تیکر امریکا نے پاکستان نوں 14 ارب ڈالر امداد دِتی۔ جدکہ ہند دے سمندری رستے توں سامان پہنچاون وچ پاکستان دا اہم کردار رہیا اے تے پاک فوج نے 2014 توں شمالی وزیرستان وچ آپریشن شروع کیتا اے جہدے وچ اوہناں نوں ڈاڈھا مالی نقصان ہو رہیا اے تے اجے وی پاکستان دے نشانے تے طالبان نیں جو پاکستان دی سلامتی لئی خطرا نیں۔ پر امریکا نے اپنی امداد نوں حقانی نیٹ ورک خلاف آپریشن نال جوڑ دِتا۔
