پرتھ(پاکستان پوائنٹ نیوز24۔مئی2017ء) آسٹریلیا وچ پڑھائی لئی گئی پڑھیار اُتے حملا۔ تفصیل مطابق آسٹریلیا دے شہر پرتھ وچ اک پاکستانی پڑھیار اُتے قاتلانا حملا کر کے اوہنوں زخمی کر دتا گیا، 30ورھیاں دی پاکستانی پڑھیار مہرین احمد آسٹریلیا دے شہر پرتھ وچ رہندی اے۔ پولیس ولوں دسیا گیا اے کہ ہفتے دی رات مہرین اپنے دوستاں نال اپنے اپارٹمنٹ پہنچی جتھے اوہناں ولوں پارٹی دا پربندھ کیتا گیا سی۔
ایس دوران مہرین سگریٹ مُل لین لئی اپارٹمنٹ توں باہر گئی پر فیر اوہ واپس نہیں آئی۔ پڑھیار دے واپس نہ آن اُتے جدوں اوہدی بھال دی کوشش کیتی گئی تے اوہ اپنے اپارٹمنٹ دے باہر ای پوڑھیاں اُتے خون نال لِبڑی پئی سی۔ پولیس نے مہرین اُتے حملے دے الزام وچ 27ورھیاں دے بندے نوں گرفتار کر لیا اے۔ پولیس ولوں دسیا گیا اے کہ حملا آور تے مہرین دی اوس رات واقعے دے پیش آن توں پہلے ملاقات ہوئی سی جدکہ مہرین ہسپتال دے آئی سی یو وچ داخل اے جتھے اوہدی حالت خطرے وچ اے۔ مہرین دے ماں پیو جو دبئی وچ رہندے نیں اوہ اپنی دھی نال ملاقات لئی پرتھ چلے گئے۔
