لندن (پاکستان پوائنٹ نیوز10۔اگست 2016ء) برطانیا وچ ٹریڈ یونین کانگریس دی نویں تحقیق دے مطابق دفتراں وچ کم کرن والیاں ادھ توں زیادا سوانیاں نوں جنسی طور اُتے ہراساں کیتا جاندا اے، اوہناں وچوں کئیاں نے ایہدی شکایت نہ کرن نوں منیا اے۔ ڈیڑھ ہزار سوانیاں اُتے کیتے جان والے سروے دے مطابق اک تہائی سوانیاں نوں ناپسندیدہ لطیفیاں دا نشانا بنایا گیا جدکہ اک چوتھائی نوں اوہناں دی مرضی دے بغیر چھوہیا گیا۔
ٹی یو ایس دی سربراہ فرانس اوگریڈی دا آکھنا اے کہ اِنج دیاں متاثرا سوانیاں نوں شرمندگی دا سامنا کرنا پیندااے تے اوہ خوفزدا وی ہوئیاں نیں۔ اوگریڈی نے ایہنوں سکینڈل قرار دیندے ہوئے آکھیا کہ چند سوانیاں نے محسوس کیتا کہ اوہناں دے مالک ایس مسئلے نال پوری طرحاں نِبڑ نہیں رہے۔ آزاد خیال مغربی ماشرے وچ سوانیاں اُتے جنسی تشدد دے واقعات نوں عام طور اُتے دبان دی کوشش کیتی جاندی اے جہدی وجا توں صحیح آنکڑے سامنے نہیں آندے تے امریکا وچ سوانیاں دے حقوق لئی کم کرن والی تنظیم نیشنل آرگنائزیشن فاروویمن دے مطابق امریکا وچ سوانیاں عام طور اُتے گھٹ عمر کُڑیاں اُتے جنسی تشدد وچ پچھلے کجھ ورھیاں توں خطرناک حد تیکر وادھا نظر آیا اے۔
ٹی یو سی دا آکھنا اے کہ دفتراں وچ کم کرن والیاں سوانیاں نوں جنسی طور اُتے ہراساں کرن دے کئی طریقے نیں جہناں وچوں اپنے ساتھی نال سیکس لائف دے بارے وچ غیر مناسب تبصرے تے مذاق کرنا۔ اوہناں نوں اوہناں دی مرضی دے بغیر چھونا، گلے لانا یا چُمی لینا یاں فیر سیکس دے مطالبا کرنا شامل نیں۔
