کابل، لندن(پاکستان پوائنٹ نیوز21۔مارچ2017ء) افغانستان وچ امریکی ڈرون حملے وچ 2009لاہور وچ سری لنکن کرکٹ ٹیم اُتے حملے دا دہشت گرد ہلاک۔ برطانوی خبر رساں ادارے ’رائٹرز‘ دے مطابق پاکستان وچ دہشت گرداں خلاف پاک فوج دے آپریشن پاروں دہشت گرداں نے افغانستان وچ اپنیاں تھاواں بنا لئیاں سن۔ رپورٹ دے مطابق پاکستانی انٹیلی جنس وسیلیاں نے آکھیا کہ امریکی ڈرون نے افغانستان دے سرحدی صوبے وچ اک گڈی نوں نشانا بنایا، جہدے وچ قاری محمد یاسین عرف اُستاد اسلم سوار سن۔
حکام نے ناں ظاہر نہ کرن دی شرط اُتے دسیا کہ حملے وچ آپ مارو بمباراں نوں تربیت دین دا ماہر قاری یاسین تے تن ہور دہشت گرد ہلاک ہوئے۔ حملے دے حوالے نال افغانستان وچ موجود امریکی ملٹری حکام ولوں کوئی بیان ساہمنے نہیں آیا۔ پاکستان دے انسداد دہشت گردی ڈیپارٹمنٹ ولوں قاری یاسین دے سِر دی 20لکھ رُپئے قیمت مِتھی گئی سی کیونکہ اوہ 2009وچ لاہوراندر سری لنکا دی کرکٹ ٹیم دی بس اُتے حملے وچ ملوث سی، جہدی منصوبا بندی مبینہ طور اُتے کالعدم لشکر جھنگوی نے کیتی سی۔
لشکر جھنگوی العامی دے ترجمان علی بن سفیان نے ڈرون حملے وچ قاری یاسین نوں ہلاک کرن دی تصدیق کیتی۔ رپورٹ دے مطابق قاری یاسین سری لنکن کرکٹ ٹیم اُتے حملے وچ ملوث ہون توں وکھ سابق صدر جنرل (ر) پرویز مشرف، جنرل ہیڈ کوارٹرز (جی ایچ کیو) تے لاہور وچ داتا دربار وچ دہشت گرد حملیاں اندر وی ملوث سی۔ رپورٹ وچ سکیورٹی وسیلیاں دا حوالا دیندے ہوئے آکھیا گیا اے کہ ڈرون حملے وچ کالعدم تحریک طالبان پاکستان (ٹی ٹی پی) دا کمانڈر امین شاہ محمود وی ماریا گیا۔ امین شاہ محمود وی آپ مارو بمباراں دی تربیت کردا سی۔
