پجنگ(پاکستان پوائنٹ نیوز25۔فروری2017ء) چینی ابلاغ وسیلیاں دی اک رپورٹ وچ آکھیا گیا اے کہ آپ مختاری بارے 46ارب ڈالر دے چین پاکستان اقتصادی راہداری منصوبے اُتے بھارت دے تحفظات بلاجواز نیں، راہداری منصوبا اک بیلٹ اک روڈ منصوبے دا حصہ اے جہداسرکاری ناں شاہراہ ریشم منصوبا اے، بھارتی حکومت دے ایس بارے تحفظات دا کوئی جواز نہیں۔ رپورٹ وچ نویں دِلی نوں آکھیا گیا اے کہ اوہ شاہراہ ریشم منصوبے بارے معروضی تے عملی نقطے اُتے غور کرے۔
تفصیل دے مطابق چینی اخبار گلوبل ٹائمز نے بھارت دے سیکرٹری خارجا ایس جے شنکر دے ایس بیان اُتے ردعمل دا وکھالا کیتا اے جہدے وچ اوہناں نے آکھیا سی کہ چین پاکستان اقتصادی راہداری منصوبا بھارت دے قبضے ہیٹھ علاقے کشمیر توں لنگھ رہیا اے جو بھارتی آپ مختاری دی خلاف ورزی اے۔ جے شنکر دے بیان اُتے ردعمل دا وکھالا کردے ہوئے اخبار نے لکھیا اے کہ بھارتی تحفظات بلا جواز نیں، چین بھارتی آپ مختاری دے تحفظات دا احترام کردا اے تے اوہدا موقف اے کہ علاقائی مسئلے بہت اہم نیں پر امید اے کہ بھارت ایس سلسلے وچ اک بیلٹ، اک روڈ تجویزاں بارے معروضی تے زیادا عملی رویا اختیار کرے گا۔
اخبار نے بھارت نوں آکھیا اے کہ اوہ مئی وچ پجنگ اندر ہون والی سلگ روڈ کانفرنس وچ رلت کرے تاں جے اوہ وی سی پیک دے معاشی فائدے توں جانو ہو سکے تے اوہنوں ایس منصوبے دی اہمیت دا پتا لگ سکے، چین دے صدر شی چن پنگ نے دسیا اے کہ 20ملکاں دے رہنماواں نے کانفرنس وچ رلت دی تصدیق کر دِتی اے پر چینی وزارت خارجا نے اوہناں دے ناں نہیں دَسے، امید اے کہ پاکستان دے وزیر اعظم میاں محمد نواز شریف تے سری لنکا دے وزیر اعظم رائل وکرمہ سنگھے وی کانفرنس وچ رلت کرن گے۔
ایس توں وکھ اخبار نے بھارت توں مطالبا کیتا اے کہ اوہ اپنے موقف وچ نرمی پیدا کرے، نویں دِلی نوں خوف اے کہ اقتصادی راہداری منصوبے دے پاکستانی کشمیر وچ لنگھن پاروں پاکستانی موقف نوں قانونی حیثیت مل جائے گی۔اخبار دا کہنا اے کہ راہداری منصوبے دی اُساری وچ پیشرف نال چین کشمیر دے جھیڑے وچ ملوث ہون دا ارادا رکھدا اے ایہ سارے خدشے بے بنیاد نیں، چین پاکستان تے بھارت دے علاقائی جھیڑیاں وچ مداخلت دا کوئی ارادا نہیں رکھدا، چین ہمیشہ توں ای ایس گل اُتے یقین رکھدا اے کہ دوویں گوانڈھی ملکاں نوں اپنے جھیڑے آپسی مشورے تے مذاکرات نال حل کرنے چاہیدے تے چین نے وی ایسے گل اُتے ای ہمیشہ زور دِرتا اے کہ سی پیک دی اُساری ایس موقف اُتے اثر انداز نہیں ہووے گی، چین دے اک بیلٹ روڈ منصوبے، ایشیا، افریقا تے یورپ نوں ملان لئی شروع کیتے گئے نیں تے ایہناں دا مقصد بین الاقوامی معیشت نوں علاقائی تجارتی نیٹ ورک تے آن والے ویلے دی پیداوار وچکار رابطا پیدا کر کے ترقی دینا اے۔
اخبار دا ہور کہنا اے کہ بھارت نوں پاکستان دی ترقی نوں اپنے لئی خطرا نہیں سمجھنا چاہیدا، جتھوں تک بھارت دی خاہش اے کہ چین، پاکستان تے بھارت نوں کشمیر دے جھیڑوے علاقے وچ اقتصادی ترقی وچ اک دوجے نال تعاون کرنا چاہیدا۔
