پجنگ(پاکستان پوائنٹ نیوز21۔فروری2017ء) چین بیلٹ اینڈ روڈ منصوبے دے تحت پاکستان نال بنیادی ڈھانچے تے تجارت دے شعبے وچ نویں رابطے پیدا کرنا چاہندا اے، چینی حکام دا کہنا اے کہ بیلٹ اینڈ روڈ منصوبے نال جڑے دوجے ملکاں دی نسبت پاکستان ساڈی پہلی ترجیح اے، ایس منصوبے دے شروع اُتے 2013وچ صدر شی نے گوانڈھی ملکاں نال دو پاسی اقتصادی شراکت داری بارے اک جامع فریم ورک دِتا سی۔
حکام دے مطابق چین پاکستان اقتصادی راہداری منصوبے کئی وسیلیاں توں پاکستان دی تجارت نوں متاثر کرے گا، ایہدے نال پاکستان دی برآمدی لاگت گھٹ ہو جائے گی تے اوہدی ٹرانسپورٹ دے نظام وچ وی نویں رجحان پیدا ہون گے، ایس منصوبے دے تحت دنیا دی سبھ توں وڈے تجارتی ملک چین نال اوہدے اقتصادی رابطے ہور پکے ہون گے تے پاکستان اندر وی پاکستانی تجارت نوں فروغ ملے گا، پاکستان دیاں 86فیصد برآمدات سمندر راہیں ہوندیاں نیں جدکہ زمینی تے فضائی راہ توں برآمدات دا کھلار محمدود اے، پاکستان نوں صرف کراچی راہیں سمندر تک پہنچ حاصل اے، ایس طرحاں اوہدیاں وستاں سمندر توں دور دے علاقیاں وچ غیر مساوری طور اُتے ونڈیاں جاندیاں نیں جہدی وڈی وجہ آوا جاوی دے لَمے پینڈے نیں، ایس طرحاں جغرافیائی طور اُتے ایہ چیز سمندر راہیں تجارت کرن وچ قدرتی اوکڑ بن جاندی اے، سیالکوٹ توں کراچی سامان بھریا کنٹینر گھلن لئی پاکستان نوں اک ہزار کلو میٹر پینڈا طے کرنا پیندا اے جہدے نتیجے وچ پاکستان اندر ٹرانسپورٹ تے برآمدی خرچے ودھ جاندے نیں تے اوہدیاں برآمدات عالمی مارکیٹ وچ ہور ملکاں دے مقابلے وچ زیادا منافغ بخش نہیں ہوندیاں نیں۔
