ریاض(پاکستان پوائنٹ نیوز15۔فروری2017ء) سعودی وزارت لیبر برائے سماجی ترقی نے سعودی کمپنی وچ نوکری دیاں آسامیاں لئی چھپن والے اشتہار دی پُن چھان شروع کر دِتی اے۔ تفصیل دے مطابق سعودی عرب وچ اک پورٹل اُتے سعودی کمپنی وچ نوکریاں لئی اشتہار دِتا گیا سی پر اشتہار دی خاص گل ایہ سی کہ اوہدے وچ نوکری لئی صرف ہندوستانی شہری ہون دی شرط رکھی گئی۔
کمپنی اشتہار وچ واضح طور اُتے لکھیا گیا کہ انجینئرنگ جاب لئی صرف ہندوستانی شہری چاہیدے نیں۔ ایس اشتہار مگروں سعودی شہریاں سنے دوجے ملکاں دے شہریاں نے سوشل میڈیا اُتے اپنے تحفظاں دا وکھالا کیتا۔ سعودی شہریاں دا کہنا سی کہ اشتہار دے حساب نال کئی سعودی شہری ایس ملازمت لئی چنگے امیدوار نیں پر کمپنی نے پتا نہیںکیوں صرف ہندوستانی شہریاں دا لکھیا اے۔ وزارت لیبر نے کئی شکایتاں ملن مگروں اشتہار چھاپن والے بندیاں خلاف تحقیقات شروع کر دِتیاں نیں۔ وزارت لیبر دے ترجمان دا کہنا سی کہ جہنے وی اشتہار دیاں شرطاں لکھیاں اوہنوں سزا دا ساہمنا کرنا پئے گا۔ ترجمان دا ہور کہنا سی کہ وزات لیبر ایس گل نوں کسے وی طور اُتے برداشت نہیں کرے گی۔
