نویں دِلی(پاکستان پوائنٹ نیوز10۔فروری2017ء) بھارتی فوجیاں نوں دِتے جان والے ناقص کھانے دا پردا چُکن والا بھارتی بارڈر سکیورٹی فورس دا اہلکار تیج بہادر یادو لاپتا ہو گیا اے۔ کشمیر میڈیا سروس دے مطابق تیج بہادر دے گھر والیاں دا پچھلے چار دِناں توں اوہدے نال کوئی رابطا نہیں ہو یا۔ تیج بہادر دی بیوی دا کہنا اے کہ شوہر دا موبائل بند جا رہیا اے۔
اوہنے شوہر دے لاپتا ہون دے حوالے نال نویں دِلی ہائی کورٹ وچ درخاست جمع کروائی اے جو فوری سنوائی لئی منظور کر لئی گئی اے۔ لاپتا ہون والے اہلکار دے وکیل ایڈووکیٹ منیش تیواری نے عدالت نوں دسیا کہ تیج بہادر دا پچھلے کُجھ دِنا توں کوئی پتا نہیں لگ رہیا ایس لئی عدالت معاملے دیاں تحقیقات کرے۔ یاد رہوے کہ مقبوضہ کشمیر دے خطے جمعوں وچ تعینات ایف سی اہلکار تیج بہادر نے اہلکاراں نوں دِتے جان والے ناقص کھانے دے حوالے نال 9جنوری نوں فیس بک اُتے اپنا بیان اپ لوڈ کیتا سی۔ اپنے ویڈیو بیان وچ سڑی ہوئی روٹی تے دال وکھاندے ہوئے اوہدا کہنا سی کہ عام فوجی اہلکار اکثر رات نوں خالی ڈھڈ ای سوندے نیں جدکہ راشن دی صورت وچ آن والا پیسہ افسر کھا جاندے نیں۔
