لندن(پاکستان پوائنٹ نیوز24۔جنوری2017ء) لندن دے علاقے یوکشائز دے اک پاکستانی نژاد برطانوی پڑھیار محمد علی نے امریکا ولوں کیتی گئی 5ملین پاﺅنڈز دی نوکری دی آفر نوں رَد کر دِتا۔ محمد علی نے موقف اختیار کیتا کہ اوہناں نوں آفر کیتی گئی رقم گھٹ سی جس وجہ توں اوہناں نے ایہ امریکی کمپنی دی پیشکش نوں قبول نہیں کیتا۔ تفصیل دے مطابق پاکستانی نژاد برطانوی پڑھیار محمد علی نے پیسیاں دی بچت بارے اک ویب سائٹ بنائی سی۔
محمد علی دی بنائی ہوئی ویب سائٹ راہیں مارکیٹ وچ موجود مختلف شیواں دیاں قیمتاں دا آسانی نال موازنہ ممکن اے۔ محمد علی نے دسیا کہ اوہنا ں دی ایہ ویب سائٹ بچت کرن دی اک ماہر ویب سائٹ اے، جو عام بندیاں لئی بالکل بلوم برگ وانگ اے۔ محمد علی نے دسیا کہ اوہناں نوں اپنی ویب سائٹ بارے اک امریکی سرمایا کار نے 50لکھ پاﺅنڈز دی پیشکش کیتی سی پر پیسے گھٹ ہون دی وجہ توں اوہناں اوس آفر نوں قبول نہیں کیتا۔
ایتھے ایہ گل وی ذکر جوگ اے کہ محمد علی12سال دی عمر وچ ای ویڈیو گیمز تے فائننشل ایپ وی بنا چکے نیں۔ ایس کمپنی توں محمد علی دی 40ہزار پاﺅنڈ ز دی آمدن ہوئی سی۔ 16ورھیاں دے محمد علی بارے ایہ آکھیا جاندا اے کہ جے اوہناںنوں اگلا مارک زکر برگ (جدکہ فیس بک دا موڈھی اے) آکھیا جائے تے غلط نہیں ہووے گا۔ ایس توں وکھ محمد علی 60ورھیاں دے کرائس تھارپ نال کاروبار وی کردے نیں۔ محمد علی نے دعوا کیتا اے کہ اوہناں دی ویب سائٹ دا پوری دنیا وچ کوئی جوڑ نہیں اے۔
