جے کسے نے دنیا دے 50ملکاں دا سفر کیتا ہووے تے اسیں اوہدے توں ڈاڈھے متاثر ہوندے آں پر جے کسے نے 100ملکاں دا سفر کیتا ہووے تے اسیں اوہدی سیاحت تے تجربے پاروں اوہدے چاہیوان ہو جاندے آں پر اک 27ورھیاں دی سوانی انج دی اے جو دنیا بھر دے سارے ملکاں دا سفر مکمل کرن والی اے۔ جلدی ای اوہدے کول دنیا دے سارے ملکاں دا سفری ثبوتاں نال سفر کرن، گھٹ عمر امریکی تے سیارہ زمین دے سارے ملکاں دا تیز ترین مسافر ہون دا اعزاز وی ہووے گا۔
کانڈرا ڈی پیکول دا تعلق کنیکٹیکٹ، امریکا توں اے۔ اوہ جولائی 2015توں ہن تیکر 181ملکاں دا سفر کر چکی اے جدکہ اوہنے 40دِناں وچ 15ہور ملکاں دا سفر کرنا اے۔ جہدے بعد اوہ دنیا دے سارے آپ مختار ملک (جمع 11اضافی ملکاں) دا سفر کر کے گینیز ورلڈ ریکارڈ بنا لووے گی۔ اوہدے سفر نوں ایکسپیڈیشن 196 (Expedition196) دا ناں دِتا گیا اے۔ اوہ انٹرنیشنل انسٹی ٹیوٹ فارپیس تھرو امن دی سفیر دے طور اُتے سفر کر ہی اے۔
