پُتر نے تن سال تیکر اپنی ماں دی لاش نوں گھر وچ لُکائے رکھیا

پُتر نے تن سال تیکر اپنی ماں دی لاش نوں گھر وچ لُکائے رکھیا

کولکتہ(پاکستان پوائنٹ نیوز06۔اپریل2018ء) ماں دی پینشن لین لئی اک بھارتی شہری نے اپنی ماں دی لاش نوں گھر وچ 3سال تیکر لُکائے رکھیا۔ سوابرتا نامی اک بندے نے ماں دی پینشن لین خاطر اوہدی لاش نوں 3سال تیکر گھر وچ ای لُکائے رکھیا۔ سوابرتا دی ماں اک (ر) ایف سی آئی افسر سی جیہدی مہینہ وار پینشن 50ہزار رُپئے سی۔ سوابرتا نامی شہری لمے چِر توں ویہلا سی تے نوکری دی بھال وچ سی، جدکہ اوہدی ماں دا انتقال ہویا تے اوہنے اپنی ماں دی لاش نوں گھر وچ ای کئی کیمکلز دی مدد نال فریزر وچ رکھی رکھیا، اک دن اک مقامی بندہ سوابرتا دے گھر گیا تے اوتھے اوہنوں بہت کیمیکلز دی بو محسوس ہوئی، اوس ویلے سوابرتا دے گوانڈھی نوں شک ہویا تے اوہنے پولیس نوں اطلاع دتی۔

گوانڈھیاں نے دسیا کہ ذکر کیتے گئے بندے نے سانوں دسیا سی کہ میری ماں نے موت مگروں کُجھ انگ عطیہ کرن دی وصیت کیتی سی جیہدی وجہ توں اوہدی لاش میڈیکل ٹیسٹ لئی مردہ گھر وچ رکھی گئی اے۔ پولیس نے سوابرتا دے والد نال گل کیتی تے اوہنے دسیا کہ اوہنوں پتا سی پر اوہ پولیس نوں اطلاع کرن بارے ڈیا ہویا سی، پولیس دا کہنا اے کہ تحقیقات لئی سوابرتا تے اوہدے والد نوں گرفتار کر لیا گیا اے۔ سوابرتا نے پولیس ساہمنے بیان دتا کہ اوہ اپنی ماں نال بہت محبت کردا سی اوہ اپنی ماں نوں اپنے توں وکھ نہیں کرنا چاہندا سی ایس لئی اوہنے انج کیتا۔ پر بعدوں اپنا بیان بدلدے ہوئے سوابرتا نے دسیا کہ اوہنے ایہ کم صرف اپنی ماں دی پینشن لین لئی کیتا۔