بیجنگ(پاکستان پوائنٹ نیوز30۔ستمبر2017ء) انسانی ہمدردی دے جذبات کسے وی بندے لئی اوہدیاں پیشہ وارانہ ذمے واریاں نبھان وچ اوکڑاں نہیں پا سکدے۔ ایسے انسانی ہمدردی دا وکھالا چینی سوانی اہلکار ولوں کیتا گیا جہدا سوشل میڈیا دی دنیا وچ غیر معمولی چرچا ہو رہیا اے۔ غیر ملکی خبر رساں ادارے مطابق پچھلے دِنا ای اک سوانی پولیس اہلکار نے عدالت وچ پیش کیتی گئی اک سوانی ملزمہ دی بھکھی نِکی دھی نوں اپنا دُدھ پیا کے انسانی جذبے دی وڈی مثال قائم کر دتی۔
انٹرنیٹ اُتے اوہدی ایہ تصویر غیر معمولی اُتے مقبول ہوندے ای لوکاں نے سوانی پولیس اہلکار دے انسانی ہمدردی دے جذبے نوں سلاہیا اے۔ ملزمہ دی نِکی دھی نوں دُدھ پیان بارے گل بات کردے ہوئے لینا دھاؤ نے آکھیا کہ اوہنے وی کجھ مہینے پہلاں ای اک بال نوں جنم دتا اے۔ جدوں ملزمہ دی دھی رو رہی سی تے اسیں سارے پریشان ہو گئے۔ میں نویں نویں ماں بنی ساں، میں بالڑی نوں چپ کروان دی بہت کوشش کیتی پر اوہ چپ نہ ہوئی۔ پولیس اہلکار دا کہنا سی کہ کسے وی سوانی پولیس اہلکار ساہمنے جدوں اجیہا واقعہ پیش آئے تے اوہ انج ای کرے گی جو میں کیتا اے۔لینا دا کہنا سی کہ، جے میں بالڑی دی ماں دی تھاں ہوندی تے میں وی ایہو امید کردی جو میں اوس بالڑی نال کیتا۔
