گجرات(پاکستان پوائنٹ نیوز01۔جولائی2017ء) بھارتی شہر گجرات وچ اک سوانی نے شیراں نال گھیری ایمبولینس وچ بال نوں جنم دے دتا۔ تفصیل مطابق 29جون نوں اک 32 ورھیاں دی سوانی نے ادھی رات نوں 12شیراں نال گھیری ایمبولینس وچ اپنے بال نوں جنم دے دتا۔ ضل امریلی دے پنڈ وچ جدوں ایمبولینس وچ سوانی نے بال نوں جنم دتا تے قریب ای موجود جنگل نیڑوں 12شیراں نے ایمبولینس نوں اپنے گھیرے وچ لے لیا۔
شیراں نے ایمبولنس دا راہ ڈک لیا پر ایمبولینس وچ موجود میڈیکل سٹاف نے بہادری دا وکھالا کردے ہوئے سوانی نوں بال دے جنم دین وچ مدد کیتی۔ ایہ صورتحال 20منٹ جاری رہن مگروں ایمبولینس دے ڈرائیور نے آہستہ آہستہ گڈی نوں چلانا شروع کر دتا۔ گڈی نوں اگانہ ودھدا ویکھ کے شیراں نے وی پیر پچھانہ پُٹنے شروع کر دتے، انج ایمبولینس نوں راہ مل گیا۔ واقعے مگروں سوانی تے اوہدے بال نوں جعفر آباد ہسپتال منتقل کیتا گیا۔ ہسپتال وسیلیاں مطابق ماں تے بال دوویں صحتمند نیں۔
