نویں دِلی(پاکستان پوائنٹ نیوز01۔جولائی2017ء) بھارتی ریاست مدھیا پردیش دے رہائشی 50ورھیاں دے بیسوری لال پورے پنڈ دیاں اکھاں دا تارا اے تے اوہدی وجہ کُجھ ہور نہیں بلکہ اوہدے قد دا نِکا ہونا اے۔ جی بالکل! 50ورھیاں دے بیسوری دا قد 29انچ اے جو دنیا دا سبھ توں نِکے قد والا بندا متھیا جاندا اے جہدے ماں پیو دی موت مگروں ہن اوہدی بھین ای اوہدی ویکھ بھال کردی اے۔
بھارتی ٹی وی مطابق بالاں وانگ گودی وچ چُکیا ہویا بیسوری لال نہ صرف اپنی بھین بلکہ پنڈ بھر دیاں اکھاں دا تارا ے جہنوں ہر کوئی ہن تیک بال ای سمجھدا اے۔ بیسوری لال ہن وی بالاں دے کپڑے ای پاندا اے۔ بیسوری لال دی بھین مطابق جنم ویلے بیسوری دا قد نارمل بال جِنا ای سی پر جویں جویں اوہدی عمر ودھدی گئی تے گھر والیاں نے ویکھیا کہ اوہناں دا قد ودھنا رُک گیا اے۔
ڈاکٹراں تے دوا دا خرچا برداشت نہ کرن کارن اوہدا ہن تیک علاج نہیں کروایا جا سکیا۔ بیسوری لال دا 55ورھیاں دا بھرا گوپی لال بالکل نارمل قد دا اے۔ اوہدا کہنا اے کہ سانوں فخر اے کہ بیسوری ساڈے خاندان دا حصہ اے۔ کئی پنڈاں دے لوک میرے بھرا نوں ویکھن لئی ساڈے گھر آﺅندے نیں جوکہ ساڈے لئی اعزاز دی گل اے۔ بیسوری آپ وی اپنے نِکے قد اُتے خش اے۔ اوہدا کہنا اے کہ مینوں اپنے نِکے قد اُتے کوئی شرمندگی اے نہ کوئی تکلیف۔ لوک میرے نال محبت کردے نیں۔
