نیندر لینڈ نے بند پئیاں جیلاں نوں لگژری ہوٹلاں وچ بدل دتا

نیندر لینڈ نے بند پئیاں جیلاں نوں لگژری ہوٹلاں وچ بدل دتا

اج کل نیندر لینڈ اک دلچسپ مسئلے نال دو چار اے۔ نیندر لینڈ وچ اینے قیدی ای نہیں جو ملک وچ موجود جیلاں نوں بھر سکن۔ پچھلی دو دہاکیاں وچ جرماں وچ کمی کارن ملک دیاں کئی جیلاں بند کر دتیاں گئیاں نیں۔ نیندر لینڈ نے گوانڈھی ملکاں نوں اپنیاں جیلاں کرائے اُتے وی دینا شروع کر دتیاں سن پر فیر وی بہت ساریاں خالی جیلاں بند کرنیاں پئیاں نیں پر ہن نیندر لینڈ نے ایس مسئلے دا دلچسپ حل کڈھ لیا اے۔

نیندر لینڈ نے ملک اندر بند پئیاں جیلاں نوں لگژری ہوٹل وچ بدل دتا اے۔ ایس طرحاں سابقہ جیل ہن موجودا ہوٹل Het Arrestuis(گھر وچ نظر بند) اے۔ اوس دیاں کوٹھریاں نوں ایس انداز نال ہوٹل وچ بدل دتا گیا اے کہ لوک اوہدی جیل دے طور اُتے شناخت نہیں کر سکدے۔ پر جیل دے بوہے پہلے ورگے ای نیں پر اوہناں نوں وی رنگ کر کے بدلن دی کوشش کیتی گئی اے۔ ایس جیل دا ہال تے پوڑھیاں وی پہلے توں مختلف نظر آﺅندیاں نیں۔

اوہناں دی شکل ہن اجیہی ہو گئی اے، جیویں فلماں وچ جیلاں دے ہال دی ہوندی اے۔ ایس ہوٹل وچ چار سوئٹ نیں، جہناں دے ناں جیلز، لائر (وکیل)، ڈائریکٹر تے جج نیں۔ جیل دے سابق ڈائریکٹر دے کمرے دا کرایہ 125توں 215ڈالر تیک اے۔ ایس ہوٹل وچ اوہ ساریاں سہولتاں نیں جو کسے وی دوجے ہوٹل یاں گیسٹ ہاﺅس وچ ہوندیاں نیں۔