ٹنڈووالہ یار(پاکستان پوائنٹ نیوز12۔اپریل2017ء) اُنج تے ہر کوئی خاب ویکھدا اے پر اوہنوں پورا کرنا ہر کسے دے وس وچ نہیں ہوندا۔ کُجھ لوک وسائل دا بہانہ بنا کے اپنے خاباں توں مونہ پھیر لیندے نیں پر کُجھ اپنے ایہناں خاباں نوں اپنی زندگی دا مقصد بنا کے اوہناں نوں پورا کرن وچ لگ جاندے نیں۔ ایس طرحاں دا ای اک خاب اج توں 20 ورھے پہلے اک پیو نے اپنی زندگی دے وڈے دُکھانت یعنی اپنے پُتر دی شہادت مگروں ویکھیا۔
13دسمبر 1997نوں اک فضائی حادثے وچ فلائٹ لیفٹیننٹ راشد احمد خان شہید ہوئے۔ اُڈان دوران فلائٹ لیفٹیننٹ راشد احمد خان دے جہاز وچ اگ لگ گئی۔ جہدے اُتے اوہناں نے اپنی جان بچان دی بجائے آبادی بچان نوں ترجیح دتی تے جہاز کُھلے وچ لے گئے جتھے جہاز تباہ ہوگیا۔ ایس حادثے وچ فلائٹ لیفٹیننٹ راشد احمد خان شہید ہوئے۔ راشد احمد خان دی شہادت اُتے اوہناں دے والد نے کمزور ہون دی بجائے اپنے آپ نوں مضبوط کیتا۔
ٹنڈووالہ یار توں 6کلو میٹر دے پندھ اُتے راشد آباد دا علاقہ راشد دے والد نے آباد کرنا شروع کر دتا جہنے فلائٹ لیفٹیننٹ راشد احمد خان دی شکل وچ اپنا اکلوتا پُتر گوا دتا سی۔ پُتر دی شہادت مگروں کمزور ہون دی بجائے اوس عظیم والد نے دوجےاں دیاں کئی دھیاں تے پُتراں دیاں زندگیاں آباد کر دتیاں۔ اوہناں نے اپنے پُتر دی شہادت دے بعد اک خاب ویکھیا تے اوہنوں پورا کرن دا ارادا کر لیا۔
عظیم والد دا ایہو خاب اج کئی لوکاں دیاں زندگیاں دا سکون اے۔ راشد آباد وچ اک ریلوے سٹیشن اے جو فلائٹ لیفٹیننٹ راشد احمد خان شہید دے والد ائر کموڈور شبیر تے اوہدے ساتھیاں نے بنایا۔ ایہو نہیں بلکہ اوہناں نے راشد آباد وچ دو سو بستریاں دا اکھاں والا ہسپتال تے اک سکول وی بنایا۔ ائر کموڈور شبیر نوں اوہناں دیاں خدمتاں دی وجہ توں ائر فورس وچ ایجنل شبیر آکھیا جاندا اے۔
دوجیاں دی خدمت کرن اُتے ائر کموڈور شبیر نوں ائر فورس دے ایدھی دا لقب وی دتا گیا اے۔ ائر کموڈور شبیر دی زندگیاں تے اوہناں دیاں خدمتاں ایس گل دا ثبوت نیں کہ انسان اپنی محبت تے خاب دی تعبیر دے جنون دے ہوندیاں ہویاں کُجھ وی کر سکدا اے۔ ائر کموڈور اک عظیم والد، اک عظیم افسر تے اک خدمت خلق کرن والا انسان اے۔
