اسلام آباد(پاکستان پوائنٹ نیوز18۔مارچ2017ء) ویاہ نوں یادگار بنان تے ویاہ دے انتظامات نوں لے کے اپنیاں ساریاں خاہشاں پوریاں کرنا ہر جوڑے دا خاب ہوندا اے۔ پاکستان وچ پچھلے کُجھ ورھیاں توں ای ویاہواں اُتے کُھلا خرچا کرن دا رواج ای ٹُر پیا اے۔ لوک ویاہواں اُتے پانی وانگ پیسہ بہاندے نیں۔پر پاکستان توں تعلق رکھن والے اک خوبصورت جوڑے نے اپنے مہنگے ویاہ دا خاب چھڈ کے اپنے ویاہ اُتے آن والے خرچے دے پیسے عطیہ کر کے مثال قائم کر دِتی۔
شہزان تے زینب دا کہنا سی کہ باقی لوکاں وانگ اسیں وی ویاہ دھوم دھام نال کرنا چاہندے ساں پر ساڈا دل مطمئن نہیں ہو سکیا تے اسیں اپنے ویاہ اُتے پیسے خرچ کرن دی بجائے اوہی پیسے ’آغا خان فاﺅنڈیشن‘ نوں عطیہ کردِتے نیں۔ اوہناں دا کہنا سی کہ ایہناں پیسیاں دے اثرات دیر لئی ہون گے۔ شہزان دا کہنا سی کہ ’آغا خان فاﺅنڈیشن‘ ایہناں پیسیاں نال غریباں دی مدد کر گی۔ذکر کیتے گئے جوڑے نے نہ صرف آپ ویاہ دے پیسے عطیہ کیتے بلکہ ویاہ وچ آن والے پروہنیاں نوں وی انج کرن دا آکھیا۔
