لندن(پاکستان پوائنٹ نیوز29۔دسمبر2016ء) پاکستانی نژاد برطانوی باکسر عامر خان دے گھر والیاں تے بیوی فریال وچکار جاری جنگ ختم ہون د اناں ای نہیں لے رہی تے ہن باکسر دی بیوی فریال مخدوم نے اپنے اُتے سوہریاں دے ظلماں دے حوالے نال اک ہور انکشاف کر دِتا۔برطانوی خبر رساں ادارے دے مطابق فریال مخدوم نے اپنے اک انٹرویو وچ دعوا کیتا اے کہ عامر خان دی وڈی بھین تابندہ نے اوہدے وال پُٹے تے سِر وچ چَپیڑاں ماریاں۔
فریال دا کہنا سی کہ ایس طرحاں دا تشدد میرے اُتے تابندہ ولوں اوس ویلے کیتا گیا جدوں میں حاملا سی پر جدوں میں تشدد بارے عامر نوں دسیا تے اوہناں نے میری گل دا یقین نہیں کیتا۔ فریال مخدوم دا روندے ہوئے کہنا سی کہ تابندہ نے ہمیشہ میرے خلاف سس، سوہرے نوں بھڑکایا، اوہ ساڈے گھر توں بہت دور رہندی اے پر اوہدا ساڈے گھر وچ اثر اینا زیادا اے کہ انج لگدا اے اوہ ہر ویلے ساڈے گھر وچ موجود ہووے۔
فریال نے انکشاف کیتا کہ جدوں اوہ تن مہینیاں دی حاملا سی، عامر دے گھر والیاں نے میری والدہ نوں نیویارک توں آکے مینوں لیجان دا آکھیا، میری والدہ نے عامر دی والدہ دے پیراں نوں ہتھ لاکے طلاق نہ دوان دا آکھیا تے عامر توں پُچھیا کہ اوہ کیہ چاہندا اے، کہ فریال نیویارک چلی جائے؟ جہدے اُتے عامر دا جواب نہیں وچ سی۔ فریال دا کہنا سی کہ ایس مشکل ویلے وچ عامر نے میرا ساتھ دِتا تے میں وی مردے دم تیکر اوہدا ساتھ نبھاواں گی۔
