لندن(پاکستان پوائنٹ نیوز17۔دسمبر2016ء) برطانوی باکسر عامر خان دے ماں پیو، بھرا، بھین تے بیوی فریال مخدوم وچکار جاری جنگ دی اصل وجہ ساہمنے آ گئی۔ تفصیل دے مطابق پچھلے دو ہفتیاں توں جاری ایس لڑائی نے عامر خان دے چاہیواناں دے ذہناں وچ ایہ سوال پا دِتا اے کہ باکسر دے ماں پیو اک دوجے خلاف پُھٹ پئے پر ہن اک برطانوی ویب سائٹ نے دعوا کیتا اے کہ فریال مخدوم دی اک تصویر نے عامر خان دے ماں پیو دے صبر نوں توڑ دِتا سی جہدے بعد حالات ایتھوں تیکر پہنچے۔
25ورھیاں دی فریال مخدوم نے چالو ورھے اپریل وچ اپنی اک سیلفی پوسٹ کیتی سی جہدے وچ اوہناں نے اپنے چاہیواناں توں اپنے والاں دے نویں رنگ بارے رائے منگی سی پر عامر دے ماں پیو دے قریبی دوست دے مطابق اوہناں نے فریال دی ایس تصویر اُتے خفگی دا اظہار کردے ہوئے اپنی نوہ اُتے الزام لایا کہ اوہ سوشل میڈیا اُتے غیر اخلاقی تصویراں کھلار رہی اے۔ ذکر کیتے گئے دوست دا کہنا سی کہ عامر دے ماں پیو پہلے وی فریال نوں غیر اسلامی کپڑے پان تے سکارف نہ لین اُتے تنقید دا نشانا بنا چکے سن پر ایس سیلفی دی وجہ توں اوہناں دے گھر وچ جھیڑے شروع ہو گئے، عامر دے والد سجاد خان دا کہنا سی کہ ہن اوہناں دوواں دی طلاق کندھ اُتے لکھی گل قرار پا چکی اے پر دوجے پاسے فریال پچھلے دیہاڑے اک وار فیر سوشل میڈیا اُتے آئی تے عامر خان دے والد دے طلاق بارے بیان اُتے ردعمل دا وکھالا کردے ہوئے آکھیا کہ میں زندگی بھر عامر دا ساتھ دین دی قسم نبھاواں گی، ساڈی طلاق دا کوئی امکان نہیں، ہن صرف سانوں موت ای وکھ کر سکدی اے۔
ایس پیغام دے نال فریال نے اپنی تے عامر خان دی پچھلی رات ٹورنٹو وچ اک چیئرٹی گالا وچ لِتی گئی تصویر وی شیئر کیتی جہدے وچ دوویں بہت خش وکھائی دے رہے سن۔ ایس توں وکھ فریال مخدوم نے ہن اپنی ایس دُکھ بھری کہانی نوں لیڈی ڈیانا نال تشبیہ دِتی اے، جہدی بعد وچ موت ہو گئی سی۔
