اسلام آباد(پاکستان پوائنٹ نیوز06۔فروری2017ء) وفاقی وزیر برائے بین الصوبائی رابطا میاں ریاض حسین پیرزادہ نے افغان کھڈاریاں نوں پاکستان وچ ٹریننگ دی آفر کردے ہوئے آکھیا اے کہ افغانستان اپنے کھڈاریاں نوں تربیت تے مقابلیاں لئی پاکستان گھل سکدا اے، پاکستان تے افغانستان وچکار خاص کر کرکٹ تے فٹبال دے میچ ہونے چاہیدے۔ تفصیل دے مطابق پیر دے دیہاڑے افغان سفیر حضرت عمر زاخیلوال نال میاں ریاض حسین پیرزادہ دی ملاقات ہوئی، ملاقات دوران وزارت بین الصوبائی رابطا دے سیکرٹری راجا محمد نادر علی تے پاکستان سپورٹس بورڈ دے ڈائریکٹر جنرل اختر نواز گنجیرا وی موجود سن۔
ایس موقعے اُتے وفاقی وزیر میاں ریاض نے آکھیا کہ افغانستان اپنے کھڈاریاں نوں تربیت تے مقابلیاں لئی پاکستان گھل سکدا اے، پاکستان تے افغانستان وچکار خاص کر کرکٹ تے فٹبال دے میچ ہونے چاہیدے، سپورٹس کمپلیکس اسلام آباد وچ پاکستان تے ایران وچکار ہون والے ڈیوس کپ دا حوالا دیندے ہوئے وفاقی وزیر نے آکھیا کہ افغانستان نوں وی اپنے کھڈاریاں نوں پاکستان گھلنا چاہیدا۔ اوہناں دا کہنا سی کہ سپورٹس کمپلیکس اسلام آباد وچ کھڈاریاں نوں کھیڈ دی سہولت، فول پروف سکیورٹی دے انتظامات موجود نیں۔ اوہناں نے ہور آکھیا کہ دوویں ملکاں دے نوجواناں نوں کھیڈ دے میدان وچ اگے ودھنا چاہیدا۔ افغانی سفیر نے ایس گل نوں چنگا قرار دیندے ہوئے آکھیا کہ دوویں ملکاں وچکار میچ ہونے چاہیدے۔
