فیصل آباد(پاکستان پوائنٹ نیوز01۔فروری2017ء) قومی ٹیسٹ ٹیم دے کپتان مصباح الحق پاکستان کرکٹ بورڈ خلاف بول پئے۔ اوہناں دا کہنا اے کہ بورڈ کسے نوں وی کپتان بنا دیوے پر کپتان بدلن توں پہلاں مسائل حل کیتے جان۔ تفصیل دے مطابق میڈیا نال گل بات کردے ہوئے مصباح الحق دا کہنا سی کہ پی سی بی وچ وڈے وڈے عقلمند لوک بیٹھے نیں، اوہ کسے نوں وی کپتان بنا دین، میں کسے دا ناں نہیں دیواںگا۔
اوہناں دا کہنا سی کہ کپتانی چھڈنا چاہندا سی پر اوس ویلے رُک گیا تے ہن شرم دوائی جا رہی اے کہ (ر) کیوں نہیں ہوندے۔ اوہناں دا کہنا سی کہ جس طرحاں دے ریمارکس آ رہے نیں اوہدے مگروں کوئی مُنڈا کپتان بنن نوں تیار نہیں ہووے گا۔ مصباح الحق دا ہور کہنا سی کہ ہوم سیریز وچ ٹیماں چنگا کھیڈدیاں نیں، بھارت اپنے ملک وچ ای جِت کے نمبر ون بنیا اے، اسیں وی یو اے ای وچ 6ورھیاں دوران چنگی کارکردگی وکھائی تے انگلینڈ وچ وی سریزی ڈرا کیتی پر چار میچ ہارن مگروں ہن لوکائی ریٹائرمنٹ لین دا مطالبا کر رہی اے حالانکہ کل سارے مینوں کرکٹ وچ واپس آن دا آکھ رہے سن۔
ٹیسٹ کپتان دا کہنا سی کہ نویں ٹیلنٹ دی کارکردگی نوں بہتر نہیں کیتا جا رہیا، ساڈی ڈومیسٹک کرکٹ دیاں پچاں دا معیار بہت خراب اے۔ اوہناں دا کہنا سی کہ ایتھوں مُنڈا آسٹریلیا جائے گا تے اوہنوں یقینن اوکڑاں دا ساہمنا کرنا پئے گا۔
