لاہور(پاکستان پوائنٹ نیوز28۔جنوری2017ء) قومی ٹیسٹ ٹیم دے کپتان آن والے ویلے دے پلان دا حصہ نہیں رہے۔ میڈیا رپورٹ دے مطابق مصباح الحق نوں پیغام گھل دِتا گیا اے کہ پی سی بی اوہناں نوں آن والے ویلے دے پلان وچ شامل نہیں سمجھدی کیوں جے اوہناں نے کرکٹ نوں چھیتی ای چھڈ دینا اے، ایہ فیصلا سینئر کھڈاری اُتے ای چھڈ دِتا گیا اے کہ اوہ ریٹائرمنٹ دا باقاعدا اعلان کدوں کرنا پسند کردے نیں۔
وسیلیاں دا ایہ وی کہنا اے کہ مصباح الحق نے کوئی فیصلا کر لیا اے تے اوہناں دا تجربا ڈومیسٹک کرکٹ وچ بہتری لیان لئی ورتیا جائے گا، اظہر علی نوں جانشین دے طور اُتے ٹیسٹ ٹیم دی قیادت دین دا امکان اے۔ دوجے پاسے یونس خان نوں 10ہزار سکور کرن والا پہلا پاکستانی بلے باز بنن دا اعزاز حاصل کرن لئی اک میچ یاں ٹور ہور دِتا جا سکدا اے، سینئر کھڈاری اجے تک 9977سکور کر چکے نیں، ریکارڈ لئی اوہناں نوں اجے 33سکور چاہیدے نیں۔ یاد رہوے کہ ریٹائرمنٹ دے حوالے نال مصباح الحق نے پی ایس ایل نوں اپنی فارم تے فٹنس دی تکڑی وچ تولدے ہوئے ایونٹ مگروں کوئی فیصلا کرن دا اشارا دِتا سی۔
