دبئی(پاکستان پوائنٹ نیوز27۔جنوری2017ء) انٹرنیشنل کرکٹ کونسل (آئی سی سی) نے قومی ون ڈے کرکٹ ٹیم دے کپتان اظہر علی نوں اک میچ لئی معطل کر دِتا اے۔ تفصیل دے مطابق آئی سی سی میچ ریفری کروکی ولوں ایڈیلیڈ وچ پاکستان تے آسٹریلیا وچکار کھیڈے گئے آخری ون ڈے میچ وچ فیلڈ امپائر سائمن فرائی تے شمس الدین دی رپورٹ اُتے متھے ویلے توں دو اوورز گھٹ کران اُتے 31ورھیاں دے اظہر علی اُتے ایہ پابندی لائی گئی اے، ایس توں پہلے 31جنوری 2016نوں آکلینڈ وچ نیوزی لینڈ خلاف ون ڈے مقابلے وچ وی اظہر علی نوں سلو اوور ریٹ اُتے وارننگ دِتی گئی سی، تے 12مہینیاں دوران دوجی وار سلو اوور ریٹ پاروں ہن اوہناں نوں اک میچ لئی معطل کر دِتا گیا اے، آئی سی سی نے معطلی توں وکھ اظہر علی نوں میچ فیس دا 40فیصد جرمانا وی کیتا اے جدکہ ٹیم دے ہور کھڈاریاں نوں 20فیصد جرمانا کیتا گیا اے۔
یاد رہوے کہ پاکستان دی اگلی ون ڈے سریزچالو ورھے اپریل وچ ویسٹ انڈیز خلاف شیڈول اے۔
