ایڈیلیڈ(پاکستان پوائنٹ نیوز26۔جنوری2017ء) 5ون ڈے میچاں دی سیریز دے آخری میچ وچ آسٹریلیا نے پاکستان نوں 57سکور توں ہرا کے سیریز 1.4توں اپنے ناں کر لئی اے۔ تفصیل دے مطابق ایڈیلیڈ دی اوول گراﺅنڈ وچ کھیڈے گئے میچ وچ آسٹریلیا ولوں دِتے گئے 370دے ٹارگٹ دے مقابلے وچ پاکستان ولوں اننگز دی شروعات اک وار فیر روایتی جہے انداز وچ ہوئی تے کپتان اظہر علی صرف 6سکور مگروں ای واپس پرت گئے، شرجیل خان نے بابر اعظم دے نال رلکے دوجی وکٹ لئی 130سکور کیتے، 79دے انفرادی سکور اُتے شرجیل خان ہمت ہار گئے، تیجے آﺅٹ ہون والے کھڈاری محمد حفیظ سن جہناں نے 3سکور ای بس کیتے۔
شعیب ملک 10سکور بنا کے کمنز دی گیند گُٹ اُتے وجن پاروں زخمی ہو کے گراﺅنڈوں باہر چلے گئے، بابر اعظم اپنے کیریئر دی چوتھی سنچری بنا کے ہیزل ووڈ دا شکار بنے۔عمر اکمل اک وار فیر وڈا سکور کرن وچ ناکام رہے تے 46سکور کرن مگروں آﺅٹ ہو گئے، محمد رضوان چھ سکور کر کے واپس پرت گئے۔ محمد عامر 17، وہاب ریاض17تے حسن علی 13سکور کر کے آﺅٹ ہوئے جدکہ شعیب ملک دوبارا بلے بازی کرن میدان وچ نہیں آئے تے انج پوری ٹیم 50ویں اوور وچ 312سکور اُتے پوویلین پرت گئی، کینگروز لئی سٹارک نے چار، کمنز نے دو جدکہ زاما، ہیزل ووڈ تے فالکنر نے اک اک کھڈاری نوں آﺅٹ کیتا۔
دوجے پاسے آسٹریلیا دی ٹیم ولوں ڈیوڈ وانر تے ٹریوس ہیڈ نے اننگز دی شروعات کیتی، محمد عامر دے پہلے اوور دی پہلی ای گیند اُتے کپتان اظہر علی نے اک مشکل کیچ پھڑن دی کوشش کیتی پر اوہ ناکام رہے۔ ڈیوڈ وارنر نوں نویں اوپنر ٹریوس ہیڈ دا ساتھ وی راس آیا تے دوواں کھڈاریاں نے چنگی بیٹنگ دا وکھالا کردے ہوئے سارے پاکستانی باﺅلرز دی ڈاڈھی خبر لئی جدکہ ایس دوران ڈراپ کیچز دے نتیجے وچ پاکستان نے آسٹریلین بلے بازاں دا ساتھ نبھان دا سلسلا برقرار رکھیا، وارنر جدوں 132سکور اُتے پہنچے تے محمد عامر نے اوہناں دا آسان کیچ ڈراپ کر دِتا، کینگروز اوپنرز دی 284دی ساجھے داری دا خاتما جنید خان نے کیتا جہناں نے وارنر نوں 179دے انفرادی سکور اُتے بابر اعظم ہتھوں کیچ آﺅٹ کروا دِتا، کپتان سٹیو سمتھ چار سکور بنا کے ایسے اوور وچ جنیدا دا دوجا شکار بنے، میسکویل 7گینداں اُتے 13سکور کر کے محمد عامر دی گیند اُتے محمد حفیظ ہتھوں کیچ آﺅٹ ہوئے، میتھوویڈ وی 8سکور کر کے حسن علی دا شکار بن گئے، ٹریوس ہیڈ وی 128سکور بنا کے آﺅٹ ہوئے، پیٹر بینڈ سکومب وی ا ک سکور بنا کے وہاب ریاض دا پہلا شکار بن گئے، مچل سٹارک 6سکور کر کے آخری اوور وچ رن آﺅٹ ہوئے۔
ایس طرحاں پاکستان لئی جنید خان تے حسن علی نے 2,2جدکہ وہاب ریاض تے عامر نے اک ، اک کھڈاری نوں آﺅٹ کیتا۔
