لاہور(پاکستان پوائنٹ نیوز20۔جنوری2017ء) چیف سلیکٹر انضمام الحق نے گرین شرٹس دی فٹنس عالمی معیار توں گھٹ ہون دا اعتراف کر لیا۔ تفصیل دے مطابق میڈیا نال گل بات کردے ہوئے انضمام الحق دا کہنا سی کہ سانوں پتا اے کہ ٹیم دا فٹنس لیول ہور انٹرنیشنل ٹیماں دے مقابلے وچ گھٹ اے پر ایس ٹیم نوں تھوڑا ٹائم دیو، ساریاں شیواں بہتر ہو جان گیاں، پاکستانی ٹیم پچھلے 6مہیناں توں کرکٹ کھیڈ رہی اے۔
اوہناں دا کہنا سی کہ انگلینڈ ٹور دے 7دن بعد ٹیم یو اے ای گی، یو اے ای توں ٹیم نیوز ی لینڈ تے فیر آسٹریلیا گئی، رُجھاں پاروں پلاننگ دا موقع نہیں مل سکیا۔ انضمام الحق دا ہور کہنا سی کہ اظہر علی ون ڈے ٹیم دے کپتان نیں جو فٹ ہوندے ای دوبارا ٹیم دی قیادت سنبھالن گے۔ ٹیسٹ کپتان مصباح الحق دے حوالے نال سوال اُتے چیف سلیکٹر نے آکھیا کہ مصباح الحق دیاں پاکستان لئی بڑیاں خدمتاں نیں، مصباح الحق پاکستان دے کامیاب ترین کپتان نیں، آسٹریلیا توں واپس آن مگروں مصباح نال کوئی گل نہیں ہوئی پر اوہناں نال ملاقات ضرور کراں گا۔ اوہناں دا کہنا سی کہ انگلینڈ ٹور توں لے کے ہر کھڈاری نوں پورا چانس دِتا گیا اے، کسے کھڈاری نوں اک دو میچاںمگروں باہر نہیں کڈھیا۔
