سڈنی(پاکستان پوائنٹ نیوز20۔جنوری2017ء) قومی ٹیم دے ہیڈ کوچ مکی آرتھر دا کہنا اے کہ جے سانوں آسٹریلیا خلاف سیریز جِتنی اے تے باﺅلرز نوں پیر ’لائن‘ توں پچھانہ رکھنا پئے گا۔تفصیل دے مطابق سڈنی وچ چوتھے ون ڈے توں پہلے پریس کانفرنس کردے ہوئے مکی آرتھر دا کہنا سی کہ جنید خان عام طور اُتے نو بالز نہیں کرواندے پر ایہ اوہناں ولوں غیر قانونی گینداں کران دا کوئی جواز نہیں اے۔
یاد رہوے کہ آسٹریلیا خلاف تیجے ون ڈے میچ دے 11ویں اوور وچ کینگروز ولوں پہلا ون ڈے کھیڈن والے پیٹر بینڈ سکومب دا سلپ وچ کیچ پھڑیا گیا پر ری پلے وچ جنید خان دا پیر لائن توں باہر نظر آیا تے گیند نوبال قرار دِتی گئی، جہدے بعد سکومب نے 82سکور بنا کے ٹیم نوں جتوان وچ اہم کردار ادا کیتا۔ مکی آرتھر دا ہور کہنا سی کہ کپتان اظہر علی ہیمسٹرنک انجری پاروں دو میچاں وچ رلت کرن توں محروم رہن مگروں واپسی لئی تیار نیں،اوہناں نے ٹیم دے ہور کھڈاریاں نال رننگ کیتی تے فیلڈنگ وچ وی اوہناں دی کارکردگی ٹھیک رہی،امید اے کہ چوتھے میچ وچ اوہ دوبارا ٹیم دی کپتانی کردے وکھائی دین گے۔
