تیجا ون ڈے: پاکستان نے آسٹریلیا نوں جِت لئی 264سکور دا ہدف دے دِتا

تیجا ون ڈے: پاکستان نے آسٹریلیا نوں جِت لئی 264سکور دا ہدف دے دِتا

پرتھ(پاکستان پوائنٹ نیوز19۔جنوری2017ء) 5ون ڈے میچاں دی سیریز دے تیجے میچ وچ پاکستان نے آسٹریلیا نوں جِت لئی 264سکور دا ہدف دے دِتا اے۔ تفصیل دے مطابق پرتھ دے ویسڑن آسٹریلیا کرکٹ ایسوسی ایشن گراﺅنڈ وچ کھیڈے گئے میچ وچ قومی ٹیم ولوں اننگز دی شروعات محمد حفیظ تے شرجیل خان نے کیتی، تیجے اوور وچ شرجیل خان نے سٹین لیک نوں 1چھکا تے 3لگاتار چوکے مارکے 20سکور بنائے جہدے بعد اگلے ای اوور وچ محمد حفیظ 4سکور بنا کے ہیز لووڈ دی گیند اُتے ایل پی ڈبلیو آﺅٹ ہو گئے۔

شرجیل تے بابر نے دوجی وکٹ لئی 49سکور بنائے، شرجیل نے ٹریوس ہیڈ دے اک اوور وچ تن چوکے لا کے اپنی چوتھی ففٹی بنائی پر اگلی ای گیند اُتے بولڈ ہو گئے، اسد شفیق وی کُجھ خاص کارکردگی نہ وکھا سکے تے 5سکور بناکے ہیڈ دی گیند اُتے خواجا ہتھوں کیچ آﺅٹ ہو گئے۔ شعیب ملک تے بابر اعظم نے چوتھی وکٹ لئی 63سکور بنائے جہدے بعد شعیب ملک 39سکور بنا کے کرسٹین لیک دا شکار بن گئے، بابر اعظم تے عمر اکمل نے 5ویں وکٹ لئی 60سکور کیتے جہدے بعد بابر 84سکور بنا کے جھیڑوے طریقے نال کیچ آﺅٹ ہو گئے، عمر اکمل اپنی فارم واپس لیاندے ہوئے وکھالی دے رہے سن جدوں 39سکور اُتے اوہ ہیزل ووڈ دی گیند اُتے کیچ آﺅٹ ہو گئے، عماد وسیم وی 9سکور بنا کے واپس پرت گئے۔

رضوان تے عامر نے مِتھے 50اووراں وچ ٹیم دا سکور 263تک پہنچایا، وکٹ کیپر و بلے باز 14تے محمد عامر 4سکور بناکے ناٹ آﺅٹ رہے۔