پاکستان کرکٹ ٹیم پرتھ وچ وی آسٹریلیا خلاف سپن باﺅلنگ نال اٹیک کرے: رمیز راجا

پاکستان کرکٹ ٹیم پرتھ وچ وی آسٹریلیا خلاف سپن باﺅلنگ نال اٹیک کرے: رمیز راجا

اسلام آباد(پاکستان پوائنٹ نیوز16۔جنوری2017ء) سابق کرکٹر تے کمنٹیٹر رمیز راجا نے آکھیا اے کہ پاکستان کرکٹ ٹیم پرتھ وچ وی آسٹریلیا خلاف سپن باﺅلر نال اٹیک کرے۔ نجی ٹی وی چینل نال گل بات کردے ہوئے رمیز راجا نے آکھیاکہ آسٹریلیا خلاف دوجے ون ڈے میچ وچ محمد حفیظ نے کپتانی بہت چنگی کیتی تے باﺅلنگ وی بہت سوہنی ہوئی۔ اوہناں دا کہنا سی کہ پاکستان نے آسٹریلیا نوں اوہناں دے ہوم گراﺅنڈ وچ ای آل آﺅٹ کر دِتا، جو چنگی گل اے۔

اوہناں نے آکھیاکہ جنیدخان تے عماو وسیم دی وجہ توں پاکستان دی باڈی لینگوئج بہت بہتر ہوئی اے، ایہ اوہ آسٹریلیا ٹیم نہیں جہنوں ہرایا نہیں جا سکدا، ایس لئی ایہ سریز جِتن دا چنگا موقع اے۔ اوہناں نے آکھیا کہ پہلا ون ڈے ہارن دے بعد قومی کرکٹ ٹیم نے جس طرحاں کم بیک کیتا اے ایہ بہت ای زبردست گل اے پر کھڈاری لوڑ توں ودھ پر اعتماد نہ ہون تے اپنیاں خامیاں اُتے قابو پر کے تیجے میچ لئی میدان وچ آن۔

اک سوال دے جواب وچ اوہناں نے آکھیاکہ پاکستان دی موجودا بیٹنگ لائن نوں نظر وچ رکھدے ہوئے ایہ سوچ ہونی چاہیدی کہ جو بلے باز فارم وچ اے اوہ میچ ختم کرے کیونکہ بعدوں آن والے بلے باز نال کُجھ وی ہو سکدا اے۔ تیجے ون ڈے وچ پاکستان دی حکمت عملی بارے گل بات کردے ہوئے رمیز راجا نے آکھیا کہ ٹیم گھبرائے نہ تے میلبورن وانگ پرتھ وچ وی سپن باﺅلرز راہیں اٹیک کرے۔

اوہناں نے آکھیا کہ حالانکہ پرتھ دی وکٹ باﺅلرز لئی چنگی سمجھی جاندی اے پر میرے خیال وچ محمد حفیظ، شعیب ملک تے عماد وسیم جس طرحاں باﺅلنگ کر سکدے نیں، آسٹریلیوی بلے بازاں نوں دباءوچ لیاندا جا سکدا اے کیونکہ آسٹریلین سپن باﺅلنگ خلاف بہت خراب پرفارمنس دے رہیا اے۔ بلے بازاں نوں مشورا دیندے ہوئے اوہناں نے آکھیا کہ پرتھ وچ گیند باﺅنس کردا اے ایس لئی بیک فٹ اُتے تے کٹ شاٹ زیادا کھیڈنے پیندے نیں ایس لئی صرف ایڈجسٹ ہون دی لوڑ اے۔ اوہناں دا کہنا سی کہ بلے باز اکثر وکٹ ولوں آن والی گیند نوں ویل لیفٹ کر دیندے نیں کیونکہ زیادا باﺅنس ہون دی وجہ توں گیند وکٹ اُتوں لنگھ جاندا اے ایس لئی بُہتے پریشان ہون دی لوڑ نہیں اے تے صرف مثبت ذہن نال میدان وچ لتھن دی لوڑ اے۔