برسبین(پاکستان پوائنٹ نیوز13۔جنوری2017ء) 5ون ڈے میچاں دی سریز دے پہلے میچ وچ آسٹریلیا نے پاکستان نوں 92سکور توں ہرا کے سیریز وچ 0-1دی برتری حاصل کر لئی۔تفصیل دے مطابق برسبین دے وولن گابا سٹیڈیم وچ کھیڈے گئے میچ وچ 269سکور دے جواب وچ پاکستان ولوں اننگز دی شروعات اظہر علی تے شرجیل خان نے کیتی تے دوویں بلے بازاں نے ٹیم دا سکور 38تیکر پہنچایا سی کہ شرجیل خان جیمز فالکنر دی گیند اُتے کیچ آ ﺅٹ ہو گئے، 1سکور دے وادھے مگروں کپتان اظہر علی ریٹائرڈ ہرٹ ہو کے میدان توں باہر چلے گئے۔
حفیظ وی چار سکور بنا کے فالکنر دا شکار بنے جدکہ عمر اکمل نوں 17سکور اُتے مچل سٹارک نے ٹریوس ہیڈ ہتھوں کیچ آﺅٹ کرایا۔ بابر اعظم چنگی فارم وچ نظر آئے پر اوہ وی 33سکور بناکے پیٹ کمنس دی گیند اُتے سلپ وچ سٹیو سمتھ نوں کیچ دے بیٹھے۔ وکٹ کیپر و بلے باز رضوان 21سکور کرکے کمنز دا دوجا شکار بنے جدکہ محمد نواز اک سکور بنا کے سٹارک دی گیند اُتے بولڈ ہوئے، کپتان اظہر علی میدان وچ واپسی دے بعد اپنا انفرادی سکور 24تک پہنچا کے فالکنر دا شکار بن گئے۔
محمد عامر 8سکور بنا کے فالکنر دا چوتھا شکار بنے جدکہ وہاب ریاض 6سکور کرن دے بعد آﺅٹ ہون والے آخری کھڈاری بنے تے انج پاکستان دی پوری ٹیم صرف 176سکور بنا کے واپس پر گئی، آسٹریلیا لئی فالکنر نے چار، کمنز نے تن، سٹارک نے دو جدکہ مچل مارش نے اک وکٹ لئی۔ ایس توں پہلے آسٹریلیا ولوں ڈیود وارنر تے ٹریوس ہیڈ نے اننگز دی شروعات کیتی، 5ویں اوور وچ محمد عامر نے وارنر نوں 7سکور اُتے شاندار گیند کردے ہوئے کلین بولڈ کر دِتا تے اگلی ای گیند اُتے سٹیو سمتھ نوں وی وکٹاں پچھے محمد رضوان ہتھوں کیچ آﺅٹ کرا دِتا۔
52دے مجموعی سکور اُتے حسن علی نے سلو ڈلیوری اُتے کرس لین نوں آﺅٹ کیتا، ٹریوس ہیڈ 39دے انفرادی سکور اُتے عماد وسیم دی گیند اُتے وکٹاں پچھے کیچ آﺅٹ ہوگئے، مچل مارش وی چار سکور بناکے عماد وسیم دی گیند اُتے رضوان ہتھوں کیچ آﺅٹ ہوئے، میکسویل تے ویڈ نے 6ویں وکٹ لئی 82سکور دا وادھاکیتا جہدے بعد میسکویل 60سکور بنا کے حسن علی دا شکار بنے، جیمز فالکنر صرف 7سکور بناکے محمد نواز دی گیند اُتے محمد حفیظ ہتھوں کیچ آﺅٹ ہوئے، ویڈ تے کمنز نے 8ویں وکٹ لئی 42سکور کیتے جہدے بعد کمنز 15سکور بنا کے رن آﺅٹ ہوگئے، مچل سٹارک نوں 10سکور اُتے حسن علی نے کلین بولڈ کیتا۔
ایس توں پہلے آسٹریلیا دے کپتان سٹیو سمتھ نے پاکستان خلاف ٹاس جِت کے پہلے بیٹنگ کرن دا فیصلا کیتا۔ آسٹریلیا ولوں دو کھڈاری کرس لین تے بلی سٹین ون ڈے ڈیبیو کر رہے نیں جدکہ پاکستانی ٹیم وچ شعیب ملک دی تھاں محمد حفیظ نوں کھڈایا گیا اے، عمر اکمل وی تقریبن دو ورھیاں بعد ون ڈے میچ کھیڈ رہے نیں۔
