آسٹریلیا وچ ٹیم سیٹ ہو گئی اے، کوشش ہووے گی کہ مخالف ٹیم نوں ٹف ٹائم دیے، سرفراز احمد نوں ٹیم مس کرے گی، اوہناں دی تھاں رضوان وکٹ کیپنگ دیاں ذمے واریاں نبھان گے: پاکستان ون ڈے ٹیم دے کپتان اظہر علی دی پریس کانفرنس

برسبین(پاکستان پوائنٹ نیوز12۔جنوری2017ء) پاکستان ون دے ٹیم دے کپتان اظہر علی نے آکھیا اے کہ آسٹریلیا وچ ٹیم سیٹ ہو گئی اے، کوشش ہووے گی کہ مخالف ٹیم نوں ٹف ٹائم دیے، سرفراز احمد نوں نوں ٹیم مس کرے گی، اوہناں دی تھاں رضوان وکٹ کیپنگ دیاں ذمے واریاں نبھان گے۔ تفصیل دے مطابق برسبین وچ میچ توں اک دن پہلے پریس کانفرنس کردے ہوئے اظہر علی نے آکھیا کہ سرفراز احمد نوں ٹیم مس کرے گی۔

اوہ اپنی والدہ دے بیمار ہون پاروں پاکستان واپس گئے نیں۔ اوہناں نے امکان ظاہر کیتا کہ سرفراز احمد آسٹریلیا خلاف پوری ون ڈے سیریز وچ سکواڈ دا حصہ نہیں ہون گے۔ اوہناں دا کہنا سی کہ سرفراز احمد دی تھاں محمد رضوان کیپنگ دیاں ذمے واریاں نبھان گے۔ ایس توں پہلے باﺅلر محمد عرفان اپنی والدہ دی وفات پاروں پاکستان پہنچ گئے نیں۔ اوہناں نے امید ظاہر کیتی کہ ٹیم وچ نویں لوکاں دی رلت تے آسٹریلیا دی سکینڈ الیون خلاف سائیڈ میچ وچ کامیابی نے ٹیم دا حوصلا ودھایا اے۔

اوہناں نے آکھیا بھاویں اوہ کوئی وڈا مقابلا نہیں سی پر کھڈاریاں دا سکور کرنا ٹیم لئی چنگا ہووے گا۔ یاد رہوے کہ پاکستان تے آسٹریلیا وچکار پہلا ون ڈے میچ جمعے نوں پاکستانی ویلے دے مطابق سویرے ساڈھے 8وجے برسبین وچ کھیڈیا جائے گا۔