سڈنی(پاکستان پوائنٹ نیوز05۔جنوری2017ء) سڈنی ٹیسٹ دے تیجے دیہاڑے پاکستان نے کھیڈ دے آخیر اُتے8وکٹاں دے نقصان اُتے 271سکور کر لئے نیں، پاکستان نوں ہن وی آسٹریلیا دی پہلی اننگز دا کسارا گھٹ کرن لئی 68سکور چاہدے نیں۔ تفصیل دے مطابق سڈنی کرکٹ گراﺅنڈ وچ جاری ٹیسٹ دے تیجے دیہاڑے کھیڈ بارش پاروں دیر نال شروع ہویا تے امپائرز نے میچ نوں 68اووراں تیکر محدود کر دِتا۔
اظہر علی 71سکور اُتے رن آﺅٹ ہوئے جدکہ کپتان مصباح الحق اک وار فیر وڈی اننگز کھیڈن وچ ناکام رہے تے 18سکور کر کے نیتھن لیون نوں چھکا مارن دی کوشش وچ باﺅنڈری اُتے کیچ آﺅٹ ہو گئے۔ اسد شفیق چار سکور بناکے کیف دی گیند اُتے سٹیو سمتھ ہتھوں سلپ وچ کیچ آﺅٹ ہوئے، سرفراز احمد وی 18سکور بناکے مچل سٹارک دی گیند اُتے کیچ آﺅٹ ہوگئے، محمد عامر چار سکور کر کے لیون دا دوجا شکار بنے، وہاب ریاض 8سکور کر کے لیون دی گیند اُتے بولڈ ہوگئے، یونس خان نے شاندار بلے بازی دا وکھالا کردے ہوئے اپنی 34ویں سنچری مکمل کیتی تے ایس طرحاں اوہ ٹیسٹ میچ کھیڈن والے ہر ملک وچ سنچری بنان والے دنیا دے دوجے کھڈاری بند گئے۔
دن دے آخیر اُتے یونس 136تے یاسر شاہ 5سکور بنا کریز اُتے موجود سن۔ آسٹریلیا لئی لیون نے تن، ہیز لووڈ نے دو، سٹارک تے اوکیف نے اک اک وکٹ لئی۔ ایس توں پہلے پچھلے دیہاڑے آسٹریلیا دے 538دے جواب وچ پاکستان نے اپنی پہلی اننگز دی شروعات کیتی تے ڈیبیو کرن والے شرجیل خان چار سکور کرکے ہیزل ووڈ دا شکار بن گئے، چھ دے مجموعی سکور اُتے بابر اعظم کوئی سکور کیتے بغیر واپس پرت گئے جدکہ بعد وچ اظہر علی تے یونس خان نے شاندار بیٹنگ دا وکھالا کیتا۔
دوجے دیہاڑے کھیڈ دے آخیر اُتے پاکستان نے دو وکٹاں دے نقصان اُتے 126سکور بنائے سن۔ دوویں وکٹاں جوش ہیز لووڈ نے لئیاں۔ ایس توں پہلے آسٹریلیا نے اپنی پہلی اننگز538سکور 8کھڈاری آﺅٹ ہون اُتے ڈکلیئر کیتی، آسٹریلیا ولوں ڈیوڈ وانر نے 113، میٹ رینشا 184، پینر بینڈ سکومب نے 110سکور بنائے۔ پاکستان ولوں وہاب ریاض نے تن، عمران خان تے اظہر علی نے دو، دو کھڈاریاں جدکہ یاسر شاہ نے اک کھڈاری نوں آﺅٹ کیتا۔
