اسلام آباد(پاکستان پوائنٹ نیوز04۔جنوری2017ء) ویسٹ انڈیز کرکٹ بورڈ (ڈبلیو آئی سی بی) دے آپریشنز منیجر رولینڈ ہولڈر نے آکھیا اے کہ سکیورٹی مسئلے حل ہون تے کھڈاریاں نوں ایسوسی ایشن دی اجازت مگروں چالو ورھے مارچ وچ 2ٹی ٹونٹی میچاں لئی ٹیم نوں پاکستان گھلن اُتے غور کر رہے آں۔ کرک انفو نوں دِتے گئے اک انٹرویو وچ رولینڈ ہولڈر دا کہنا سی کہ پی سی بی ولوں پاکستان وچ دو ٹی ٹونٹی کھیڈن دی اک پیش کش اے جو ویسٹ انڈیز پلیئرز ایسوسی ایشن (ویپا) تے سکیورٹی نال جُڑی اے۔
اوہناں دا کہنا سی کہ ڈبلیو آئی سی بی نوں پی سی بی ولوں اک سکیورٹی منصوبا ملیا اے جہنوں داخلی سلامتی دے منیجر نوں گھلیا اے جدکہ ویپا تے داخلی سلامتی دا اک آزاد ادارا سکیورٹی رپورٹ تیار کرن وچ رُجھیا اے۔ رولینڈ ہولڈر نے آکھیا کہ ڈبلیو آئی سی بی تے ویپا دوویں کھڈاریاں تے سٹاف دی سلامتی لئی اپنے طور اُتے بہت متحرک نیں، جویں ای ایہ رپورٹ ملے گی فیر بورڈ میچاں دی تھاواں دا دورا کرکے آخیری فیصلا کرے گا۔
یاد رہوے کہ پی سی بی نے آئی سی سی دے پچھلے دِنا اک اجلاس وچ ویسٹ انڈیز بورڈ نوں ٹیم دے دورے اُتے غور کرن لئی راضی کیتا، امید کیتی جا رہی اے کہ لاہور 18مارچ تے 19مارچ نوں دو ٹی ٹونٹی میچاں لئی ویسٹ انڈیز ٹیم دی مجمانی کرے گا۔ پاکستان تے ویسٹ انڈیز دیاں ٹیماں ایہناں میچاں دے بعد ٹی ٹونٹی کھیڈن لئی امریکی ریاست فلوریڈا جان گیاں۔
