مشکل دور ختم، ہن ترقی تے کامیابی حاصل کرن دا ویلا اے: شاہد آفریدی

کراچی(پاکستان پوائنٹ نیوز04۔جنوری2017ء) قومی ٹیم دے سابق کپتان شاہد آفریدی نے نویں سال دے شروع اُتے اپنے چاہیواناں لئی ویڈیو پیغام جاری کر دِتا۔ تفصیل دے مطابق سماجی رابطے دی ویب سائٹ ٹویٹر اُتے جاری کیتے گئے اپنے پیغام وچ آفریدی دا کہنا سی کہ پاکستان پچھلے 25توں 30ورھیاں توں اوکڑاں دا دا شکار اے تے اسیں بہت ساریاں قربانیاں دِتیاں نیں پر ہن ویلا قربانیاں دین دی بجائے ترقی تے کامیابیاں حاصل کرن دا اے۔ اوہناں دا کہنا سی کہ ملک دی ترقی تے کامیابی غریب لوکائی نوں اُتانہ لیان نال ممکن اے، ایس وار غریباں اُتے زیادا توجہ دین دی لوڑ اے۔ آل راﺅنڈر دا ہور کہنا سی کہ 2016وچ امن و قومی سلامتی دے حوالے نال بہت بہتری آئی جہدے لئی وزیر اعظم تے سابق آرمی چیف جنرل راحیل شریف مبارکباد دے حق دار نیں۔ اوہناں دا کہنا سی کہ ساڈے ساریاں دی دعا اے کہ نویں سپہ سالار قمر جاوید باجوہ ایس سفر نوں جاری رکھن تاں جے سانوں ایہ ملک ترقی دی منزل ول سفر کردا نظر آئے۔سابق ٹی ٹونٹی کپتان دا کہنا سی کہ دشمن سانوں غلط پیغام دین دی کوشش کردے نیں پر لوکائی سمجھدار نیں ، اوہ دوست تے دشمن وچ تمیز کر سکدے نیں۔ آفریدی نے اپنے پیغام وچ ہور آکھیا کہ سی پیک منصوبا اجے بوٹا اے، اوہدے توں بڑیاں امیداں نیں، سی پیک دے نتیجے وچ بے روزگاری ختم ہووے گی تے جرائم وی ختم ہون گے کیوں کہ جرائم بے روزگاری توں جنم لیندے نیں۔