لاہور(پاکستان پوائنٹ نیوز22۔دسمبر2016ء) اپنیاں دے ٹھکرائے سابق ٹیسٹ کرکٹر حسن رضا متحدہ عرب امارات دی نمائندگی کرن توں صرف کُجھ مہینے دو رہ گئے۔تفصیل دے مطابق 7ٹیسٹ میچاں وچ پاکستان دی نمائندگی کرن والے حسن رضا نے 1996وچ فیصل آباد ٹیسٹ وچ صرف 14ورھیاں دی عمر وچ اپنا ٹیسٹ کیریئر شروع کیتا سی پر 2005دے بعد توں اوہ قومی ٹیم توں باہر نیں تے پچھلے 15ورھیاں توں ون ڈے ٹیم وچ وی تھاں نہیں بنا سکے۔
گرین شرٹس وچ کھیڈن دے موقعے ختم ہوندے ویکھ کے حسن رضا نے متحدہ عرب امارات لئی کھیڈن دا ارادا کر لیا تے ہن صرف 5مہینیاں بعد اوہ اماراتی ٹیم لئی انٹرنیشنل کرکٹ کھیڈن دے اہل ہو جان گے۔ میڈیا نال گل بات کردے ہوئے حسن رضا دا کہنا سی کہ اوہ پچھلے 3ورھیاں توں متحدہ عرب امارات وچ فرسٹ کلاس کرکٹ کھیڈ رہے نیں تے یو اے ای لئی انٹرنیشنل کرکٹ کھیڈن دے اہل ہون تیکر 35ورھیاں دے ہو جان گے، اوہ جلدی ای انٹرنیشنل کرکٹ کھیڈنا چاہندے نیں کیوں جے اج کل اوہ چنگی فارم وچ نیں۔ حسن رضا دا ہور کہنا سی کہ یو اے ای دے گراﺅنڈ تے سہولتاں بہت چنگیاں نیں تے اوہناں نوں امید اے کہ آن والے ورھے اپریل یاں مئی وچ یو اے ای لئی انٹرنیشنل کرکٹ کھیڈن دا اہل ہو جاواں گا۔
