برسبین ٹیسٹ: پاکستان نے کھان پین دے وقفے اُتے اک وکٹ گوا کے 20سکور بنالئے

برسبین ٹیسٹ: پاکستان نے کھان پین دے وقفے اُتے اک وکٹ گوا کے 20سکور بنالئے

برسبین(پاکستان پوائنٹ نیوز16۔دسمبر2016ء) پاکستان تے آسٹریلیا وچکار تن میچاں دی ٹیسٹ سیریز دے پہلے تے واحد ڈے نائٹ ٹیسٹ میچ دے دوجے دیہاڑے آسٹریلیا دی پوری ٹیم اپنی پہلی اننگرز وچ 429سکور بنا کے آﺅٹ ہو گئی جہدے بعد پاکستان نے کھان پین دے وقفے اُتے اک وکٹ گوا کے 20سکور بنا لئے نیں۔ تفصیل دے مطابق برسبین کرکٹ گراﺅنڈ وچ جاری میچ دے دوجے دیہاڑے سٹیو سمتھ تے بینڈ سکومب نے اننگز شروع کیتی، سمتھ 130سکور بنا کے آﺅٹ ہوئے جہدے بعد میڈیسن وی اک سکور بنا کے عامر دا شکار بن گئے، میتھوی ویڈ وی کُجھ خاص نہ کر سکے تے ست سکور بنا کے واپس پرت گئے، مچل سٹارک وی 10سکور بنا کے عامر دی گیند اُتے واپس پرتے، پیٹر بینڈ سکومب اپنی پہلی ٹیسٹ سنچری پوری کرن دے بعد 105سکور بنا کے بولڈ ہوئے، جوش ہیزل ووڈ 8سکور بناکے عامر ای دی گیند دا شکار بنے۔

نیتھن لیون تے جیکسن برڈ نے آخری وکٹ لئی 49قیمتی سکور دا وادھا کیتا جہدے بعد لیون 29سکور بنا کے یاسر شاہ دا شکار بنے تے انج کینگروز 420سکور بنا سکے۔ پاکستان لئی محمد عامر تے وہاب ریاض نے 4.4جدکہ یاسر شاہ نے دو شکار کیتے، آسٹریلیا ولوں کپتان سٹیو سمتھ نے 130، بینڈ کومب نے 105تے رینشا نے 71سکور دی شاندار اننگز کھیڈی۔ یاد رہوے کہ پہلے دیہاڑے کھیڈ دے آخیر تیکر آسٹریلیا نے 3وکٹاں دے نقصان اُتے 288سکور بنائے سن۔

آسٹریلیا ولوں اننگز دی شروعات ڈیوڈ وارنر تے میٹ رینشا نے کیتی، دوویں اوپنرز نے ٹیم نوں اعتماد دِتا پر 32دے انفرادی سکور اُتے ڈیوڈ وارنر محمد عامر دی گیند اُتے ایل بی ڈبلیو ہو گئے تے اگلے ای اوور وچ یاسر شاہ نے عثمان خواجا نوں چار سکور اُتے مصباح الحق دے ہتھوں کیچ آﺅٹ کروایا، وہاب ریاض نے رینشا نوں 71سکور اُتے وکٹاں پچھے کیچ کرایا۔ پہلے دیہاڑے دا کھیڈ جدوں ختم ہویا تے سٹیو سمتھ 110تے بینڈ سکومت 64سکور نال وکٹ اُتے موجود سن، دوویں کھڈاریاں وچکار 137رنز دی ساجھے داری بنی۔