لاہور(پاکستان پوائنٹ نیوز03۔دسمبر2016ء) قومی کرکٹ ٹیم کول اک وار فیر ٹیسٹ کرکٹ ٹیم رینکنگ وچ دوجی پوزیشن اُتے آن دا موقع موجود اے۔ نیوزی لینڈ خلاف دو ٹیسٹ میچاں دی سیریز ہارن دے بعد پاکستان کرکٹ ٹیم دو درجے ہیٹھاں آن دے بعد آئی سی سی ٹیسٹ رینکنگ وچ چوتھے نمبر اُتے پہنچ گئی اے۔ کُجھ ہفتے پہلاں پاکستان ٹیم دی ٹاپ 2پوزیشنز اُتے موجودگی نوں پاکستانی میڈیا نے چار دن دی چاندنی آکھیا پر ایہ حقیقت اے کہ پاکستان کرکٹ ٹیم ہُن وی ٹاپ 2 ٹیماں وچ واپس آن دی دوڑ توں باہر نہیں ہوئی۔
پاکستان ٹیم کول آن والے تن ہفتیاں دے دوران اپنی رینکنگ بہتر بنان دا موقع موجود اے، بھارت خلاف کُجھ دن پہلے پہلا ٹیسٹ ڈرا کرن دے بعد اگلے دوویں ٹیسٹ ہارن والی انگلش ٹیم نے جے سیریز دے باقی دوویں ٹیسٹ میچاں وچ وی ناکام رہندے ہوئے بھات نوں تن میچاں دے مارجن نال سیریز جِتن دا موقع دے دِتا تے اوہ تن درجے ہیٹھاں ہو کے 5ویں نمبر اُتے چلی جائے گی جہدا فائدا جنوبی افریقا، پاکستان تے آسٹریلیا نوں ہووے گا جو اک اک درجے اُتے جا کے چوتھے، تیجے تے دوجے نمبر اُتے آ جان گیاں پر جے اوہنے بھارت نوں اگلے دومیچاں وچوں صرف اک ٹیسٹ جِتن دِتا تے تن ، صفر نال ہارن دے مگروں اوہ ٹاپ 4ٹیماں وچ موجود رہوے گی پر اوہدے پوائنٹس (102) 5ویں پوزیشن اُتے موجود ٹیم جنوبی افریقا دے برابر ہو جان گے۔
