دبئی(پاکستان پوائنٹ نیوز08۔اکتوبر۔2018ء) پاکستان تے آسٹریلیا وچکار دبئی ٹیسٹ دی پہلی اننگز وچ اسد شفیق نے 118ویں اوور وچ دو چوکے لا کے پاکستان دے موجودہ وزیر اعظم و سابق کپتان عمران خان دا ٹیسٹ سکور دا ریکارڈ توڈ تا۔ 66ورھیاں دے عمران خان 88ٹیسٹ میچاں دیاں (1971توں1992) 126اننگز وچ 3807سکور بنا کے بُہتے سکور بنان والے پاکستانی بلے بازاں دی لسٹ وچ 12ویں نمبر اُتے سن جدکہ اسد شفیق نے 62میچاں دیاں103اننگز وچ 3848سکور بنا کے عمران خان کولوں 12واں نمبر کھوہ لیا اے۔
آسٹریلیا خلاف دبئی ٹیسٹ میچ توں پہلاں اسد شفیق نوں عمران خان توں اگانہ نکلن لئی صرف 40سکور چاہیدے سن ، دوجے دن اسد شفیق اپنی 21ویں ففٹی کرن مگروں 80سکور اُتے آؤٹ ہوئے۔ اسد شفیق دا اگلا نشانہ ہن پاکستان دے دوجے سینئر کھڈاری حنیف محمد نیں جیہناں نے 1952توں 1969دوران 55ٹیسٹ میچاں دیاں 97اننگز وچ 3915سکور بنائے ہوئے نیں۔یاد رہوے کہ پاکستان ولوں ٹیسٹ کرکٹ وچ یونس خان 10099بنا کے پہلے نمبر اُتے نیں۔
