نویں دِلی( پاکستان پوائنٹ نیوز11۔اگست۔2018ء ) بھارتی سابق کپتان سنیل گواسکر نے عمران خان دی تقریب حلف برداری وچ رلت توں معذرت کر لی اے۔ عمران خان نے گواسکر توں وکھ کپل دیو تے نوجوت سدھو نوں وی دعوت نامہ گھلیا سی۔ سدھو نے ایس گل دی تصدیق کیتی اے کہ کپل دیو تے اوہ پاکستان آ رہے نیں جدکہ سنیل گواسکر نے اپنیاں رُجھاں(مصروفیات) پاروں عمران خان دی تقریب حلف برداری وچ رلتی ہون توں معذرت کیتی اے۔
چیتے رہوے کہ لیجنڈری کرکٹر عمران خان دی بطور وزیر اعظم تقریب حلف برداری وچ تن سابق بھارتی کھڈاریاں نوں رلت دی دعوت دتی گئی سی۔ پاکستان تحریک انصاف دے چیئرمین عمران خان18اگست نوں بطور وزیر اعظم حلف چُکن گے۔ جیہدے لئی پروہنیاں نوں دعوت نامے جاری کیتے گئے سن۔پچھلے دیہاڑے تحریک انصاف دے سینیٹر فیصل جاوید نے میڈیا نال گل بات کرد ے ہوئے دسیا سی کہ عمران خان نے بطور وزیر اعظم اپنی تقریب حلف برداری وچ تن سابق بھارتی کھڈاریاں نوں وی سدن دا فیصلا کیتا اے۔
فیصل جاوید دا کہنا سی کہ عمران خان نے سابق بھارتی کپتان و آل راؤنڈر کپل دیو، اوپننگ بلے باز سنیل گواسکر تے نوجوت سنگھ سدھو نوں تقریب حلف برداری وچ رلت دی دعوت دتی اے۔ ایس توں وکھ عمران خان نے 1992دا ورلڈ کپ جتن والی پاکستانی کرکٹ ٹیم نوں وی تقریب حلف برداری وچ رلت دا دعوت نامہ گھلیا اے۔ پر تازہ اطلاع مطابق بھارتی سابق کپتان سنیل گواسکر نے عمران خان دی تقریب حلف برداری وچ رلت توں معذرت کر لی اے۔ سنیل گواسکر نے اپنیاں رُجھاں(مصروفیات) پاروں عمران خان دی تقریب حلف برداری وچ رلتی ہون توں معذرت کیتی اے۔
