لاہور(پاکستان پوائنٹ نیوز17۔مئی2018ء ) آئر لینڈدی کرکٹ ٹیم پاکستان وچ مکمل کرکٹ سیریز کھیڈن لئی بے قرار ۔ بورڈ چیف ایگزیکٹیو نوں پی سی بی ولوں دعوت دی اُڈیک اے۔ غیر ملکی خبر رساں ادارے مطابق چیف ایگزیکٹو وارن ڈیو ٹروم نے پاکستان ٹیم گھلن دی حامی بھر لی اے۔ ٹیم اپنے دورے دوران ٹیسٹ، ون ڈے تے ٹی 20سیریز کھیڈے گی۔ ملاہائیڈ وچ ٹیسٹ میچ مگروں غیر ملکی میڈیا نال گل بات کردے ہوئے اوہناں نے دعوت نامے توں پہلاں ای ٹیم گھلن رضا مندی ظاہر کر دتی اے۔
اوہناں دا کہنا سی کہ جے ستاریاں دی چال ٹھیک رہی تے کوئی وجہ نہیں کہ اسیں پاکستان نال سیریز کھیڈن نہ جائیے۔ ساڈا بورڈ دورہ پاکستان لئی پوری طرحاں تیار اے پر سارے آئرش کرکٹ سٹارز نال مشورہ کیتا جائے گا، جے اوہ تیار ہوئے تے پاکستان جان وچ کوئی رکاوٹ نہیں ہوئے گی ۔ اوہناں نے ہور دسیا کہ پاکستان بورڈ دے چیئرمین نجم سیٹھی نال ٹیسٹ میچ دوران غیر رسمی گل بات ہوئی اے۔ اوہناں نے آفیشل طور اُتے دعوت اجے تیکر نہیں دتی پر اسیں اوہناں نوں واضح آکھ دتا اے کہ جس ویلے اوہ سکیورٹی معاملات کلیئر ویکھن تے سانوں دعوت دین اسیں ضرور کھیڈن آواں گے۔
