دبئی(پاکستان پوائنٹ نیوز30۔اپریل2018ء) متحدہ عرب امارات وچ 50اووراں دے میچ دوران بُہتا سکور کرن دا نواں ریکارڈ بن گیا ۔ متحدہ عرب امارات وچ گریڈ تھری کرکٹ دوران راشد علیم کرکٹ ٹورنامنٹ وچ فیونکس میڈیسنز نے ینگ ٹیلنٹ کرکٹ اکیڈمی دی ٹیم خلاف ٹاس جِت کے پہلے بیٹنگ دا فیصلا کیتا تے 59سکور اُتے اوہدے دوویں اوپنرز واپس پرت گئے، محمد وسیم 14تے ایوب عنایت نے 41سکور کیتے۔
محمد اکرام تے عمر علی خان نے تیجی وکٹ لئی 201سکور دا وادھا کیتا جیہدے مگروں عمر اکرام 55گینداں اُتے 12چوکیاں تے 5چھکیاں دی مدد نال 102سکور بنا کے آؤٹ ہوئے۔ عمر علی خان 40گینداں اُتے اک چوکے تے 21چھکیاں دی مدد نال 140سکور کر کے واپس پرت گئے۔ حافظ کلیم تے روہن مصطفی نے وی شاندار سنچریاں سکور کیتیاں، حافظ کلیم 52گینداں اُتے 9چوکیاں تے 20چھکیاں دی مدد نال 172سکور کر کے واپس پرتے جدکہ روہن مصطفی نے 75گینداں اُتے 7چوکیاں تے 8چھکیاں دی مدد نال 118سکور بنائے۔
فہد انصاری نے 15گینداں اُتے 3چوکیاں تے 4چھکیاں دی مدد نال 43سکور جوڑے، وسیم باری دے 22گینداں اُتے 9چوکیاں نال 47تے عامر حیات دے 24گینداں اُتے اک چوکے تے 8چھکیاں دی مدد نال بنائے گئے 64سکور دی وجہ توں فیونکس میڈیسنز نے مِتھے گئے 50اووراں وچ 9 وکٹاں دے نقصان اُتے 760سکور کیتے۔ ینگ ٹیلنٹ کرکٹ اکیڈمی لئی انیرتھ جگدیش، ونایت وجے تے چیرین جارج نے 2،2جدکہ عمر کھوکھر تے پرادھمینا جگدیش نے 1,1کھڈاری نوں آؤٹ کیتا۔ 761ورگے پہاڑ جہے سکور ساہمنے ینگ ٹیلنٹ کرکٹ اکیڈمی دی ٹیم 50اووراں وچ 6وکٹاں دے نقصان اُتے صرف 185سکور ای بناسکی۔
