کراچی(پاکستان پوائنٹ نیوز14۔اپریل2018ء) قومی ٹیم دے سابق کپتان و مشہور آل راؤنڈر شاہد آفریدی سابق عظیم گول کیپر منصور احمد دا حال چال پُچھن اپڑ گئے۔ تفصیل مطابق 1994دے ہاکی ورلڈ کپ دے فائنل وچ ہالینڈ خلاف پینالٹی سٹروک اُتے شاندار گول کیپنگ راہیں پاکستان نوں چیمپئن بنوان والے سابق گول کیپر پچھلے کُجھ مہینیاں توں دل دے روگ دا شکار نیں تے ڈاکٹراں نے اوہناں نوں علاج لئی باہرلے ملک جان دا مشورہ دتا اے۔
سابق گول کیپر دی حالت خطرناک اے تے ایس ویلے اوہناں دا دل صرف 20توں 30فیصد کم کر رہیا اے جدکہ جُثے دے ہور انگ وی کم کرنا چھڈدے جا رہے نیں۔ اوہناں نوں 18دن پہلے مقامی ہسپتال دے آئی سی یو وچ منتقل کیتا گیا سی جتھے اوہناں دے علاج لئی 5لکھ رُپئے اوہناں دے ادارے کسٹم تے باقی 10لکھ رُپئے پاکستان ہاکی فیڈریشن نے دتے سن۔ منصور احمد ڈاڈھے بیمار ہون دے نال نال مالی طور اُتے وی بہت پریشان نیں تے اوہناں دے گھر والیاں نے متعلقہ اداریاں تے وزیراعظم پاکستان توں وی ایس سلسلے وچ مدد دی درخاست کیتی سی جیہدے مگروں قومی ٹیم دے سابق کپتان شاہد آفریدی ایس سلسلے وچ اگانہ آئے تے اوہناں دی مدد دا اعلان کردے ہوئے آکھیا کہ منصور احمد دے علاج دے سارے خرچے شاہد آفریدی فاؤنڈیشن برداشت کرے گی۔
ایس موقعے تے شاہد آفریدی نے منصور حمد نال ملاقات کر کے اوہناں دی تندرستی لئی دعا وی کیتی۔اپنے اک ٹویٹ وچ شاہد آفریدی دا کہنا سی کہ اج میں اپنے ہاکی لیجنڈ تے اولمپیئن منصور احمد دی خبر لئی تے قومی ہیرو لئی اپنی بھرپور حمایت دا آکھیا۔ مینوں بہت خشی اے کہ اوہ دنوں دن ٹھیک ہو رہے نیں ۔تے میں اوہناں دی مکمل صحت یابی لئی دعاگو آں، شاہد آفریدی فاؤنڈیشن ساڈے لیجنڈ دا ہر طرحاں خیال رکھے گی۔
