کراچی آ کے بہت خشی محسوس کر رہیا: سرویوین رچرڈز

کراچی آ کے بہت خشی محسوس کر رہیا: سرویوین رچرڈز

کراچی(پاکستان پوائنٹ نیوز23۔مارچ2018ء) سابق ٹیسٹ کرکٹ سرویوین رچرڈز نے آکھیا اے کہ کراچی آ کے بُہت خشی محسوس کر رہیا واں ، ملن والیاں محبتاں اُتے شکر گزار آں، خاہش اے کہ پاکستان وچ انٹرنیشنل کرکٹ بحال ہوئے۔ پی ایس ایل فرنچائز کوئٹہ گلیڈی ایٹرز دے مالک ندیم عمر دی دعوت اُتے کراچی آن والے سرویوین رچرڈز نے جناح انٹرنیشنل ائر پورٹ اُتے میڈیا نال گل بات کردے ہوئے آکھیا کہ کئی ورھیاں بعد کراچی آ کے خُشی محسوس کر رہیا واں۔

اوہناں نے آکھیا کہ پی ایس ایل تھری دا فائنل ویکھن وچ مزہ آئے گا، آس اے کہ پاکستان وچ انٹرنیشنل کرکٹ چھیتی پوری طرحاں بحال ہوئے گی۔ سرویوین رچرڈز نے آکھیا کہ کوئٹہ گلیڈی ایٹرز فائنل وچ اپڑی تے بُہت خُشی ہوئی۔ اوہناں دا کہنا سی کہ میں مینٹیور دی حیثیت نال اپنیاں ذمے واریاں نبھائیاں ۔ اک سوال دے جواب اُتے اوہناں دا کہنا سی کہ ویسٹ انڈین ٹیم دا پاکستان آنا چنگی گل اے، اوہ چنگا کھیڈدی رہی تے آس اے کہ ٹی ٹونٹی سیریز دلچسپ رہوے گی۔ اوہناں نے آکھیا کہ پاکستان وچ کرکٹ دا بہترین ٹیلنٹ موجود اے۔ پاکستانی ٹیم ہور اُچیائیاں اُتے جائے گی۔