کراچی(پاکستان پوائنٹ نیوز23۔مارچ2018ء) پاکستان کرکٹ بورڈ دے چیئرمین نجم سیٹھی نے اعلان کیتا اے کہ اگلے سال پاکستان سپر لیگ دے ادھے میچ پاکستان وچ کروائے جان گے۔ کراچی وچ نیشنل سٹیڈیم دے دورے دے موقعے اُتے نجم سیٹھی نے انکلوژرز تے ڈریسنگ روم دیاں تیاریاں دا جائزہ لیا۔ ایس موقعے تے میڈیا نال گل بات کردے ہوئے نجم سیٹھی دا کہنا سی کہ جے لوک میرے اُتے یقین کرن ، جو میں کہنا واں اوہ میں کردا وی آں۔
لاہور تے کراچی نوں ہن انٹرنیشنل میچاں لئی گرین سگنل مل گیا اے جو قوم لئی پہلی وڈی خُشخبری اے، ہن پشاور تے اسلام آباد دے سٹیڈیم بناواں گے۔اوہناں دا کہنا سی کہ دوجی چنگی خبر ایہ اے کہ اگلے سال پاکستان سپر لیگ دے ادھے میچ لاہور وچ کروائے جان گے۔ نجم سیٹھی دا ہور کہنا سی کہ اسیں پی ایس ایل 4وچ ڈبل ویک اینڈ میچ کروانا چاہنے آں۔ جمعرات تے جمعے نوں متحدہ عرب امارا ت جدکہ ہفتے تے ایتوار نوں پاکستان وچ میچ کراواں گے۔ چیئرمین پی سی بی دا ہور کہنا سی کہ ہور تن توں چار ٹیماں پاکستان دے دورے لئی رابطے وچ نیں پر چالو ورھے ہور کوئی غیر ملکی ٹیم پاکستان نہیں آئے گی کیونکہ پاکستان دیاں ساریاں سیریز ملکوں باہر شیڈولڈ نیں۔
