قومی ٹیم دے 26کھڈاری صرف 4لکھ ڈالرز دے بدلے ٹی 10لیگ وچ ان ایکشن ہون گے

لاہور(پاکستان پوائنٹ نیوز11۔دسمبر2017ء) پاکستان کرکٹ بورڈ (پی سی بی) نے 26کھڈاریاں نوں متحدہ عرب امارات وچ ہون والی ٹی 10لیگ وچ رلت دی اجازت دے دتی اے تے ہن ایہ تفصیلاں وی ساہمنے آ گئیاں نیں کہ ایہناں کھڈاریاں دے لیگ وچ رلتی ہون دے بدلے ایہناں نوں چار لکھ ڈالرز دتے جان گے۔ وسیلیاں مطابق 10لیگ وچ رلت کرن والے 26قومی کھڈاریاں دا بھاء چار لکھ ڈالرز (تقریبن سوا چارکروڑ پاکستانی) لایا گیا اے۔ دوجے پاسے ٹی 10لیگ وچ پاکستانی کھڈاریاں نوں گھلن دے مخالفاں دا کہنا اے کہ ایس لیگ وچ بُہتیاں ٹیماں دے مالک بھارتی نیں تے ایہ اک طرحاں بھارتی لیگ اے۔ ایس لئی پی سی بی نوں ایہدی حمایت نہیں کرنی چاہیدی پر پی سی بی نے لیگ دے مخالفاں دے الزاماں نوں رد کر دتا اے۔