لاہور(پاکستان پوائنٹ نیوز29۔نومبر2017ء) آف سپنر سعید اجمل نے ٹیسٹ تے ون ڈے کرکٹ توں ریٹائرمنٹ دا اعلان کر دتا اے۔ راولپنڈی وچ نیشنل ٹی ٹونٹی سیمی فائنل وچ لاہور وائٹس نال مقابلے مگروں میڈیا نال گل بات کردے ہوئے سعید اجمل دا کہنا سی کہ میں اپنے کیریئر وچ صرف پاکستان لئی کھیڈیا۔اوہناں دا کہنا سی کہ مشکل ویلے وچ مدد اُتے اہلیہ تے ماں پیو دا شکریہ اا کرنا واں۔
اوہناں دا کہنا سی کہ شعیب ملک تے مصباح الحق نے وی اوہناں بڑا ساتھ دتا۔ اوہ مطمئن ہو کے ٹیسٹ تے ون ڈے کرکٹ توں ریٹائرمنٹ دا اعلان کر رہے نیں پر ٹی ٹونٹی لیگز کھیڈنا جاری رکھن گے۔ اوہناں دا کہنا سی کہ پاکستان وچ ٹیلنٹ دی کوئی کمی نہیں اے پر پاکستان کرکٹ بورڈ نوں ملک وچ آف سپنرز بارے سوچنا چاہیدا۔ یاد رہوے کہ ایس توں پہلاں سعید اجمل دا کہنا سی کہ نیشنل ٹی ٹونٹی اوہناں دے کیریئر دا آخری ٹورنامنٹ ہوئے گا جہدے مگروں اوہ کرکٹ نوں چھڈ دین گے۔
