بھارت وچ 28دناں دے بال نال زیادتی: مشہور کرکٹر ڈیرن سیمی وی بول پئے

بھارت وچ 28دناں دے بال نال زیادتی: مشہور کرکٹر ڈیرن سیمی وی بول پئے

نویں دِلی(پاکستان پوائنٹ نیوز20۔نومبر2017ء) بھارت دیاں گلیاں تے بساں وچ سوانیاں نال زیادتی دیاں خبراں تے ساہمنے آؤندیاں رہندیاں نیں پر چانکیہ دے دیس وچ اک جنسی بھڑیئے نے 28دناں دے بال نوں اپنی ہوس دا نشانہ بنایا۔ ایس حوالے نال ویسٹ انڈیز نوں دو وار ٹی ٹونٹی ورلڈ کپ جتوان والے کپتان ڈیرن سیمی نے وی غصے دا وکھالا کردے ہوئے سخت بیان دتا اے۔

ڈیرن سیمی نے مائیکرو بلاگنگ ویب سائٹ ٹویٹر اُتے بھارتی خبر رساں ادارے دی اک خبر شیئر کیتی، جہدے مطابق بھارتی ریاست اتر پردیش وچ 25ورھیاں دے نوجوان نے صرف 28دناں دے نکے بال نوں زیادتی دا نشانہ بنایا۔ ایس خبر اُتے گل بات کردے ہوئے ڈیرن سیمی نے آکھیا کہ ’میں کُجھ لکھن دی کوشش کر رہیا واں پر میرا غصہ میرے اُتے حاوی ہو رہیا اے، ایہ عمل ہر لحاظ نال بہت غلط اے تے ایہ بندہ نفرت جوگ اے، ایس معاملے وچ یقینی طور اُتے انصاف ہونا چاہیدا‘ ڈیرن نے اپنے غصے دا وکھالا کردے ہوئے جنسی بھیڑیے نوں گالھ وی کڈھی۔ یاد رہوے کہ ڈیرن سیمی ولوں شیئر کیتی گئی خبر دو سال پرانی اے۔